24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Հայաստանը ՀԱՊԿ գլխավոր քարտուղարի պաշտոնում թեկնածո՞ւ ունի
Քաղաքականություն
05.11.2018 | 13:47
ՀԱՊԿ գլխավոր քարտուղարի պաշտոնում, ըստ մամուլի տեղեկությունների, Հայաստանը պատրաստվում է առաջադրել ՀՀ պաշտպանության նախկին նախարար Վաղարշակ Հարությունյանի թեկնածությունը: Factor.am-ի հետ զրույցում Հարությունյանը ո՛չ հաստատեց, ո՛չ հերքեց լուրը:
«Կադրային հարցերը չեմ մեկնաբանում»,- ասաց Վաղարշակ Հարությունյանը:
ԱԳՆ մամլո խոսնակ Աննա Նաղդալյանն էլ մեր հարցմանն ի պատասխան հիշեցրեց, որ ՀԱՊԿ նոր գլխավոր քարտուղարի հարցը խորհրդակցությունների փուլում է:
«ԱԳ նախարարն այս թեմայով խոսել է անցյալ շաբաթ ԱԺ-ում կայացած քննարկումների ժամանակ: Հավելենք, որ կազմակերպության նոր գլխավոր քարտուղարի հարցը խորհրդակցությունների փուլում է: Այս քննարկումները որոշակի կոնֆիդենցիալ բնույթ ունեն և չեն ընթանում հրապարակային դաշտում: Հարգելով այդ սկզբունքը՝ հավելյալ տեղեկություն չենք կարող տրամադրել՝ չվնասելու համար այդ քննարկումները: Հայաստանի համար առաջնային կարևորություն ունի քարտուղարության արդյունավետ գործունեությունը, և հենց դրան են ուղղված մեր ջանքերը»,- նշեց Աննա Նաղդալյանը:
Նշենք, որ ավելի վաղ էլ ռուսական «Կոմերսանտ»-ը գրել էր, որ ՀԱՊԿ-ում քննարկվում է գլխավոր քարտուղարի պաշտոնում Բելառուսի Անվտանգության խորհրդի պետական քարտուղար Ստանիսլավ Զասի նշանակման հարցը:
Բելառուսի ԱԳՆ մամուլի քարտուղար Անատոլի Գլազը, սակայն, նշել է, որ իրենք նման տվյալներ չունեն: «Մենք նման տեղեկություն չունենք: Հարցը համապատասխան մակարդակով դեռ քննարկվելու է նոյեմբերի 8-ին Աստանայում: Ներկայում նույնիսկ հայտնի չէ, թե ո՞ր երկրից կլինի թեկնածուն»,- ասել է Անատոլի Գլազը:
