Ռուսաստանը պատրաստ է Հայաստանի հետ քննարկել «Թրամփի ուղուն» մասնակցությունը. ՌԴ ԱԳՆ

Ռուսաստանը պատրաստ է Հայաստանի հետ քննարկել «Թրամփի ուղի» նախաձեռնության պարամետրերը և Մոսկվայի հնարավոր մասնակցությունն այս նախագծում: Երևանի հետ խորհրդակցությունները կարող են սկսվել այն բանից հետո, երբ Մոսկվան մանրակրկիտ ուսումնասիրի նոր տրանսպորտային միջանցքի վերաբերյալ հայ-ամերիկյան առաջարկները։ Այս մասին հայտարարել է Ռուսաստանի արտաքին գործերի նախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը։

«Հայ-ամերիկյան նախագծի մանրամասները դեռ պետք է ուսումնասիրվեն։ Մենք պատրաստ ենք խորհրդակցել մեր հայ գործընկերների հետ՝ քննարկելու ինչպես նախաձեռնության պարամետրերը, այնպես էլ՝ Ռուսաստանի հնարավոր մասնակցությունը»,- Կալուգինի խոսքերն է մեջբերում ՌԻԱ Նովոստին։ Նա հավելել է, որ դրա համար կան բավարար հիմքեր։ Նա նաև նշել է Հայաստանի կարգավիճակը ինտեգրացիոն միավորումներում։

«Պետք է հաշվի առնել նաև Հայաստանի ԵՏՄ-ին անդամակցության գործոնը։ Ակնհայտ է, որ մեր գործընկերները չեն կարող առանց Ռուսաստանի»,- ասել է Կալուգինը։

Նա նշել է, որ ռուսական կողմն արդեն ներգրավված է առաջարկվող երթուղու երկայնքով հիմնական ենթակառուցվածքներում և որ «Հարավկովկասյան երկաթուղիներ» ընկերությունը, որը «Ռուսական երկաթուղիներ» ընկերության դուստր ձեռնարկությունն է, ունի Հայաստանի երկաթուղային ցանցի կառավարման կոնցեսիա։

Կալուգինը նաև ընդգծել է, որ առաջարկվող «Թրամփի ուղի» երթուղին մեծ մասամբ կանցնի «ռուս սահմանապահների պատասխանատվության տարածքով», ինչը Մոսկվային դարձնում է ապագա միջանցքի տեխնիկական և ռեժիմի պարամետրերի վերաբերյալ քննարկումների կարևոր մասնակից:

Թարգմանությունը՝ Էմմա Չոբանյանի