Պուտինի օգնականը չի բացառել պատերազմի ավարտից հետո Դոնբասի ապառազմականացումը

ՌԴ նախագահ  Վլադիմիր Պուտինի օգնական Յուրի Ուշակովը չի բացառել այն հնարավորությունը, որ Դոնբասում չեն տեղակայվի ո՛չ ռուսական, ո՛չ էլ ուկրաինական զորքեր, գրում է BBC-ի ռուսական ծառայությունը։

«Լիովին հնարավոր է, որ այնտեղ զորքեր չլինեն՝ ո՛չ ռուսական, ո՛չ էլ ուկրաինական։ Այո՛, բայց կլինեն Ռուսաստանի Ազգային գվարդիան, մեր ոստիկանությունը, ամեն ինչ, ինչ անհրաժեշտ է կարգուկանոնը պահպանելու և կյանքը կազմակերպելու համար», – ասել է նա «Կոմերսանտի» թղթակից Անդրեյ Կոլեսնիկովի հետ հարցազրույցում՝ մեկնաբանելով Ուկրաինայի նախագահ Վլադիմիր Զելենսկիի կողմից Դոնբասի ճակատագրի վերաբերյալ հնարավոր ազգային հանրաքվեի մասին հայտարարությունը։

Այս տարբերակը հիմնված է այն նախադրյալի վրա, որ «ամբողջ Դոնբասը… Ռուսաստանի Դաշնության տարածք է և այն կլինի մեր վարչակազմերի վերահսկողության տակ»: Այս մասին  հայտարարել է Ուշակովը: Նրա խոսքով՝ «վաղ թե ուշ, եթե ոչ բանակցությունների միջոցով, ապա ռազմական ճանապարհով, այս տարածքը կանցնի Ռուսաստանի Դաշնության լիակատար վերահսկողության տակ»:

Ռուսաստանի իշխանությունները պնդում են, որ Ուկրաինայում պատերազմը կարող է ավարտվել միայն այն դեպքում, եթե Մոսկվային փոխանցվի Դոնբասի լիակատար վերահսկողությունը: Ուկրաինայի կողմից այդ տարածքներից կամավոր հրաժարվելը Կիևի «կարմիր գծերից» մեկն է, և Զելենսկին հայտարարել է, որ այս հարցի շուրջ համաձայնության չի հասել «Թրամփի խաղաղության ծրագրի» շրջանակներում:

Մեկնաբանելով ԱՄՆ-ի հետ բանակցությունների ընթացքը՝ նա նշել էր, որ «խաղաղության ծրագրի» նախագծի ներկայիս տարբերակը ներառում է Դոնբասում ապառազմականացված գոտու տարբերակ։ Թե ով և ինչպես կվերահսկի այն, պարզ չէ։

«Ամերիկացիները փնտրում են որոշակի ձևաչափ։ Նրանք քննարկել են «ազատ տնտեսական գոտու» հարցը, որը ամերիկացիները այդպես են անվանում են, մինչդեռ ռուսները՝ ապառազմականացված գոտի. որտեղ ուկրաինական զորքերը դուրս են գալիս Դոնեցկի մարզից, և ռուսական զորքերը չեն մտնում այդ տարածք», – պատմել էր Զելենսկին այդ տարբերակի մասին։