02.02.2026 | 18:58
Ժաննա Անդրեասյանը «Զվարթնոց» օդանավակայանում դիմավորել է Ֆուտզալի Հայաստանի ազգային հավաքականին
Զելենսկին հայտարարել է, որ տարածքների հնարավոր զիջման հարցը պետք է լուծի ուկրաինացի ժողովուրդը
Քաղաքականություն
12.12.2025 | 11:02
Ուկրաինայի նախագահ Վլադիմիր Զելենսկին նախօրեին լրագրողներին ասել է, որ Ռուսաստանին տարածքային հնարավոր զիջումների հարցը պետք է որոշի ուկրաինացի ժողովուրդը, գրում է BBC-ի ռուսական ծառայությունը։
«Ես կարծում եմ, որ ուկրաինացի ժողովուրդը կպատասխանի այս հարցին։ Անկախ նրանից՝ ընտրություններ են, թե հանրաքվե, ուկրաինացի ժողովուրդը պետք է արտահայտի իր դիրքորոշումը», – ասել է նա։
Զելենսկին նաև հաստատել է, որ Կիևն ԱՄՆ-ին է ուղարկել «խաղաղության պլանի» թարմացված տարբերակը։ Նա նաև հայտարարել է, որ ԱՄՆ-ն պնդում է երկրի արևելքում ռուս և ուկրաինական զորքերի միջև ապառազմականացված «ազատ տնտեսական գոտի» ստեղծելու գաղափարը՝ որպես կարգավորման մաս։
«Նրանք տեսնում են, որ ուկրաինական զորքերը լքում են Դոնեցկի մարզը, և ենթադրյալ փոխզիջումն այն է, որ ռուսական զորքերը չեն մտնի այս տարածք։ Նրանք չգիտեն, թե ով է կառավարելու այդ տարածքը, որն արդեն անվանում են «ազատ տնտեսական գոտի» կամ «ապառազմականացված գոտի», – լրագրողներին ասել է Զելենսկին։
Այս պլանի համաձայն՝ Ռուսաստանը պարտավոր չի լինի դուրս բերել իր զորքերը Դոնեցկի մարզից կամ Խերսոնի և Զապորոժիեի մարզերում գտնվող իր դիրքերից, այլ դուրս կգա Խարկովի, Դնեպրոպետրովսկի և Սումիի մարզերի այն մասերից, որոնք վերահսկում է։
Ռուսաստանը նախկինում հայտարարել էր ամբողջ Դոնբասը, այդ թվում՝ չորս տարվա լայնածավալ պատերազմի ընթացքում չգրավված տարածքները, վերահսկողության տակ վերցնելու մտադրության մասին։
Ըստ Ուկրաինայի նախագահի՝ Դոնեցկի մարզի ապագա կարգավիճակը և Զապորոժիեի ատոմակայանի վերահսկողությունը Վաշինգտոնի հետ պատերազմը դադարեցնելու համաձայնագրի շուրջ բանակցություններում երկու հիմնական վիճելի հարցեր են։
«Սրանք երկու թեմաներ են, որոնք մենք շարունակում ենք քննարկել», – հավելել է նա։
Թարգմանությունը`Էմմա Չոբանյանի
