Միքայել արքեպիսկոպոս Աջապահյանին թույլ են տվել տեղափոխել «Իզմիրլյան» ԲԿ

Միքայել արքեպիսկոպոս Աջապահյանի պաշտպանական թիմը հայտնում է, որ նրան թույլատրել են տեղափոխել «Իզմիրլյան» հիվանդանոց՝ բժշկական համապատասխան օգնություն ցուցաբերելու համար։ Պաշտպանների հայտարարության մեջ նշվում է, որ Քրեակատարողական բժշկական կենտրոնի տնօրենն այսօր՝ դեկտեմբերի 11-ին, հայտնել է, որ դիմումը և փաստաթղթերը վերահասցեագրվել են Երևան-Կենտրոն ստորաբաժանում և առաջարկվել է կազմակերպել Աջապահյանին ցուցված վիրահատական միջամտությունը:

««Իզմիրլյան» բժշկական կենտրոնում իր հաշվին Միքայել Սրբազանի վիրահատվելու հարցը բարձրացվել էր դեռևս 07.10.2025 թվականի Քրեակատարողական ծառայությանն ուղղված դիմումով: Քրեակատարողական ծառայությունը նշված դիմումը վերահասցեագրել էր «Քրեակատարողական բժշկական կենտրոն» ՊՈԱԿ-ին:

Միաժամանակ Միքայել Սրբազանի պաշտպանը 29.10.2025թ. գրավոր դիմում էր ներկայացրել Քրեակատարողական բժշկական կենտրոնին, որին ի պատասխան միայն 28.11.2025թ. Կենտրոնի տնօրենը հայտնել էր, որ Միքայել Սրբազանը հրաժարվել է անվճար վիրահատությունից:
Հետագայում, արդարադատության նախարարը այս իրավիճակը փորձել էր բացատրել, իբրև սահմանված դիմում չներկայացնելու հանգամանքով: Այդպիսի դիմումներ չէին համարել Միքայել Սրբազանի պաշտպանների դիմումները:

Ընդ որում, 2025թ. հոկտեմբերի 7-ից սկսած 2 ամսվա ընթացքում որևէ պաշտոնատար անձ գրավոր կարգով չի պարզաբանել, որ պետք է ձևական որոշ պահանջներ ապահովել, քանի որ միայն այդ դեպքում իրենք հաշվի կառնեն կալանավորված անձի առողջության իրավունքը»,-հայտնում են պաշտպանական թիմից:

Ավելի վաղ ԱԺ պատգամավոր Գառնիկ Դանիելյանը հայտարարել էր, որ Միքայել արքեպիսկոպոս Աջապահյանը վիրահատության կարիք ունի, ՀՀ արդարադատության նախարար Սրբուհի Գալյանն էլ լրագրողների հետ զրույցում նշել էր, որ Աջապահյանին այսօր իրավաբան կմոտենա, դիմում պետք է ներկայացնի։

Հիշեցնենք, որ Երևանի քրեական դատարանի դատավոր Արմինե Մելիքսեթյանը իշխանությունը զավթելու հրապարակային կոչ հնչեցնելու գործով սեպտեմբերի 24-ին մեղադրական վերդիկտ է կայացրել Հայ առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի վերաբերյալ և օրեր անց կայացված դատավճռով նրան դատապարտել 2 տարի ժամկետով ազատազրկման։