Ֆուտբոլի Չեմպիոնների լիգայում ավարտվել է 6-րդ տուրը։
Մադրիդի «Ռեալը» սեփական խաղադաշտում 1:2 հաշվով պարտվել է անգլիական «Մանչեսթեր Սիթիին», որի կազմում առաջին խաղակեսում գոլի հեղինակ են դարձել անգլիացի կիսապաշտպան Նիկո Օ’Ռայլին ու նորվեգացի հարձակվող Էրլինգ Հոլանդը։ Մադրիդցիների կազմում խաղի հաշիվը բացել է բրազիլացի վինգեր Ռոդրիգոն (տեսանյութ)։
Լոնդոնի «Արսենալը» 3։0 հաշվով արտագնա հաղթանակ է տարել բելգիական «Բրյուգեի» նկատմամբ։ Դուբլի հեղինակ է դարձել անգլիացի հարձակվող Նոնի Մադուեկեն, մեկ գոլ էլ խփել է բրազիլացի վինգեր Գաբրիել Մարտինելին (տեսանյութ)։
Չեմպիոնների լիգայի գործող գավաթակիր ֆրանսիական ՊՍԺ-ն հյուրընկալվելիս գոլազուրկ ոչ-ոքի է խաղացել Բիլբաոյի «Աթլետիկի» հետ։
6-րդ տուրից հետո մրցաշարային աղյուսակը գլխավորում է «Արսենալը», որն ունի 18 միավոր։ Մյունխենի «Բավարիան» 15 միավորով երկրորդն է, իսկ 3-5-րդ տեղերը բաժանող ՊՍԺ-ն, «Մանչեսթեր Սիթին» ու իտալական «Ատալանտան» ունեն 13-ական միավոր։ Մադրիդի «Ռեալը» 12 միավորով 7-րդն է։
