Մայր Աթոռի տեղեկատվական համակարգից հայտնում են, որ Մայր Աթռը հանդես է եկել հայտարարությամբ, որով դատապարտել է եկեղեցական կարգ ու կանոնների կոպիտ խախտումներով տարբեր թեմերի եկեղեցիներում պատարագի արարողությունների կազմակերպումը։
Հայտարարությունը՝ ստորև․
«Մայր Աթոռը խստագույնս դատապարտում է վարչապետի գլխավորությամբ իշխանությունների կողմից, իրավապահ մարմինների ուժային միջամտություններով, եկեղեցական կարգ ու կանոնների, ինչպես և ՀՀ Սահմանադրության և օրենսդրության կոպիտ խախտումներով, հավատացյալների հոգևոր զգացմունքները վիրավորելով ու պառակտում սերմանելով «Պատարագի» արարողությունների կազմակերպումը տարբեր թեմերի եկեղեցիներում։
Թեմակալ առաջնորդի հոգևոր իշխանության շրջանցումով, եկեղեցական ընկալյալ կարգի ու կանոնի անտեսումով որևէ եպիսկոպոսի մասնակցությունը «Պատարագներին» կանոնական կոպտագույն խախտում է, ինչը տեղի ունեցավ Շիրակի թեմի Սուրբ Աստվածածին (Յոթ վերք) առաջնորդանիստ եկեղեցում։
Դեռևս զերծ մնալով խիստ միջոցների կիրառումից՝ Մայր Աթոռը հորդորում է կանոնախախտ եպիսկոպոսներին դադարեցնել իրենց խոտոր ընթացքը և կեղծ ու մտացածին բովանդակությամբ հրապարակային ելույթները, վերադառնալ կանոնական դաշտ՝ հետևելով մեր Սուրբ Եկեղեցու դարերով նվիրագործված ավանդույթներին, գործել բացառապես հոգևոր ասպարեզում և օրինականության ու միասնականության պահպանման բարձր գիտակցությամբ, որը եպիսկոպոսի՝ իբրև առաքելական հաջորդականությամբ օժտված սպասավորի պարտականությունն է, կոչումն ու առաքելությունը»։
Նշենք, որ տևական ժամանակ է, ինչ խզված է եկեղեցի-պետություն կապը։ Վարչապետ Փաշինյանը պարբերաբար կրկնում է, որ կաթողիկոսը պետք է հեռանա, քանի որ, ըստ նրա, Գարեգին Բ-ն խախտել է կուսակրոնության ուխտը։
Վերջին շրջանում Հայ Առաքելական եկեղեցու ներսում ևս համերաշխությունը խախտված է։
Փաշինյանը տաղավար տոներին չի մասնակցում պատարագներին։ Սակայն սկսել է մասնակցել հոգևոր վերնախավի դեմ ընդվզող քահանաների մատուցած պատարագներին։ Քանիցս մասնակցել է Հովհաննավանքի կարգալույծ հռչակված Տեր Արամ քահանա Ասատրյանի, Թալինի Կաթողիկե Սուրբ Աստվածածին եկեղեցու հոգևոր հովիվ Տեր Թադե քահանա Թախմազյանի, Արարատ գյուղի Սուրբ Հակոբ եկեղեցում Տեր Երվանդ քահանա Բաբայանի, Խաչիկ գյուղի Սուրբ Աստվածածին եկեղեցու քահանա Տեր Հովհաննես Մաթևոսյանի, Երևանի Սուրբ Սարգիս եկեղեցու քահանա Տեր Արարատ Օրդյանի, Գյումրիի Յոթ վերք եկեղեցում Տեր Մկրտիչ քահանա Մուշադյանի ձեռամբ մատուցված պատարագներին։
Նշենք նաև, որ օրեր առաջ 10 եպիսկոպոսներ կոչ էին արել Ամենայն հայոց կաթողիկոս Գարեգին Բ-ին կամովին հանգստի գնալ:
«Մենք ակնկալում ենք, որ Գարեգին Բ Կաթողիկոսը, ի սեր մեր եկեղեցու և մեր ժողովրդի, սթափ կգնահատի ստեղծված իրավիճակը, չի տանի մեր ազգն ու մեր Եկեղեցին ավելորդ ցնցումների, կամովին հանգստյան կկոչվի և այդ կերպ հնարավոր կլինի նոր ընտրություններ կազմակերպելու», – նշված է հայտարարությունում, որը հրապարակվել է վարչապետի ընտանիքին պատկանող «Հայկական ժամանակ»-ում:
