Քաղաքականություն
05.12.2025 | 22:18
Netflix հոսքային ծառայությունը հայտարարել է Warner Bros.-ի՝ HBO Max հոսքային ծառայության կինո և հեռուստատեսային ստուդիայի ձեռքբերման մասին։ Reuters-ի տվյալներով՝ գործարքի ընդհանուր արժեքը կազմում է 82,7 միլիարդ դոլար, իսկ սեփական կապիտալի արժեքը 72 միլիարդ դոլար է, գրում է The Insider-ը։
Պայմանագրի պայմանների համաձայն՝ WBD-ի յուրաքանչյուր բաժնետեր Warner Bros. Discovery-ի յուրաքանչյուր բաժնետոմսի դիմաց կստանա 23,25 դոլար կանխիկ և 4,50 դոլար Netflix-ի բաժնետոմսեր: Գործարքը, ինչպես սպասվում է, կավարտվի WBD-ի՝ Discovery Global-ի հանրային ընկերության առանձնացման ավարտից հետո, որը նախատեսվում է իրականացնել 2026 թվականի երրորդ եռամսյակում:
Նոր Discovery Global սփին-օֆ ընկերությունը կներառի CNN-ը և TNT Sports-ը ԱՄՆ-ում, Discovery Channels-ը և հեռարձակող ալիքները Եվրոպայում, ինչպես նաև Discovery+ հոսքային ծառայությունը և Bleacher Report սպորտային մեդիա նախագիծը: Netflix-ն առաջարկել է 5 միլիարդ դոլար փոխհատուցում, եթե գործարքը չստանա կարգավորող մարմինների հաստատումը:
«Մեր առաքելությունը միշտ էլ եղել է աշխարհին զվարճացնելը։ Warner Bros.-ի անհավանական շոուների և ֆիլմերի գրադարանը՝ սկսած «Կասաբլանկա» և «Քաղաքացի Քեյն» ֆիլմերի նման դասականներից մինչև ժամանակակից սիրված ֆիլմեր, ինչպիսիք են «Հարրի Փոթերը և ընկերները», մեր հիթերի՝ «Stranger Things»-ի, K-Pop-ի «Դևերի որսորդներ»-ի և «Կաղամարի խաղը»-ի հետ համատեղելով, մենք կարող ենք դա անել ավելի լավ»,- նշել է Netflix-ի համանախագահ Թեդ Սարանդոսը։
Գործարքը կնքվել է Netflix-ի, Paramount Skydance-ի և Comcast-ի միջև շաբաթներ տևած պայքարից հետո։ Նախկինում ընկերությունը տարիներ շարունակ խուսափում էր Հոլիվուդի խոշոր ձեռքբերումներից։
Ավելի վաղ հաղորդվել էր, որ Netflix-ն ուսումնասիրում է Warner Bros. Discovery-ի ստուդիան և հոսքային բիզնեսը ձեռք բերելու հնարավորությունը: Հնարավոր գործարքը գնահատելու համար ծառայությունը ներգրավել է Moelis & Co. ներդրումային բանկին, որը խորհրդատվություն է տրամադրել Skydance Media-ին Paramount Global-ի ձեռքբերման հարցում:
Այնուամենայնիվ, Netflix-ի գործադիր տնօրեն Թեդ Սարանդոսը նշել էր, որ ընկերությունը հետաքրքրված չէ WBD-ի մալուխային ցանցերով, այդ թվում՝ CNN-ով, TNT-ով, Food Network-ով և Animal Planet-ով:
Թարգմանությունը՝ Էմմա Չոբանյանի
