06.04.2026 | 23:30
Հրդեհ Թաիրով բնակավայրում. այրվել է ավտոմեքենա
Ռուսաստանը և Հնդկաստանը համատեղ ձեռնարկություն կստեղծեն՝ ռուսական զենքի սպասարկման համար
Քաղաքականություն
05.12.2025 | 18:14
Ռուսաստանը և Հնդկաստանը հայտարարել են իրենց ռազմական և ռազմատեխնիկական համագործակցությունը վերանայելու մտադրության մասին։ Այս մասին ասվում է ՌԴ նախագահ Վլադիմիր Պուտինի և Հնդկաստանի վարչապետ Նարենդրա Մոդիի համատեղ հայտարարության մեջ, որը հրապարակվել է ուրբաթ Նյու Դելիում կայացած բանակցություններից հետո, գրում է DW-ի ռուսական ծառայությունը։
Ի թիվս այլ բաների՝ Պուտինը և Մոդին համաձայնության են եկել Հնդկաստանում համատեղ արտադրություն հաստատել պահեստամասերի, բաղադրիչների և այլ արտադրանքի համար՝ ռուսական զենքի և ռազմական տեխնիկայի սպասարկման, հնդկական բանակի կարիքները բավարարելու և դրանք «բարեկամ» երրորդ երկրներ արտահանելու համար։ Այս նպատակով Ռուսաստանը տեխնոլոգիաներ կփոխանցի Հնդկաստան, որտեղ կստեղծվեն համատեղ ձեռնարկություններ։
Կրեմլի կայքում հրապարակված փաստաթղթի համաձայն՝ երկու երկրների միջև ռազմական և ռազմատեխնիկական գործընկերությունը կկենտրոնանա համատեղ հետազոտությունների և մշակումների, ինչպես նաև առաջադեմ պաշտպանական հարթակների արտադրության վրա՝ «ի պատասխան Հնդկաստանի ինքնաբավության ձգտումների»։
Կողմերը նաև հետաքրքրություն են հայտնել խորացնել համագործակցությունը կարևորագույն հանքանյութերի և հազվագյուտ հանքանյութերի հետախուզման, վերամշակման և զտման տեխնոլոգիաների ոլորտում։ Երկու առաջնորդներն ընդգծել են, որ «ռուս-հնդկական կապերը մնում են դիմակայուն արտաքին ճնշման նկատմամբ»։
Բանակցություններից հետո Պուտինը և Մոդին մամուլի համար հայտարարություններով են հանդես եկել։ Մասնավորապես, Ռուսաստանի նախագահը հայտարարել է, որ «Ռուսաստանը պատրաստ է շարունակել ապահովել վառելիքի անխափան մատակարարումը» Հնդկաստանին։
Bloomberg-ը նախկինում հայտնել էր, որ ռուսական նավթային ընկերությունների դեմ ԱՄՆ պատժամիջոցների ֆոնին Հնդկաստանը կրճատել է Ռուսաստանից նավթի գնումները։
Թարգմանությունը՝ Էմմա Չոբանյանի
