09.06.2026 | 13:05
Մենք կսկսենք նաև մեքենայի ներսում արձանագրել վարչական իրավախախտումը, այն է՝ հեռախոսը․ փոխնախարար․ ՏԵՍԱՆՅՈՒԹ
Սյունիքի մարզպետը ՀՀ նախագահին ներկայացրել է մարզի սոցիալ-տնտեսական զարգացմանն ուղղված նախաձեռնությունները
05.12.2025 | 16:54
ՀՀ նախագահ Վահագն Խաչատուրյանն այսօր ընդունել է Սյունիքի մարզպետ Ռոբերտ Ղուկասյանին։ Այս մասին տեղեկացնում են նախագահի աշխատակազմից:
Նշվում է, որ հանդիպման ընթացքում մարզպետը նախագահին ներկայացրել է Սյունիքի մարզում տիրող ընդհանուր իրավիճակը, ընթացիկ զարգացումները, ինչպես նաև իրականացվող ու առաջիկայում նախատեսվող բազմաճյուղ ոլորտային ծրագրերը։
«Անդրադարձ է կատարվել Սյունիքի մարզի սոցիալ-տնտեսական զարգացմանն ուղղված նախաձեռնություններին և «Հայաստան» համահայկական հիմնադրամի հետ համագործակցությամբ իրականացվող ծրագրերի ընթացքին։ Հատուկ շեշտվել է Սպանդարյան ջրանցքի վերանորոգման ռազմավարական նշանակությունը, որի համար նախատեսվում է ուղղել նաև հիմնադրամի ամենամյա հեռուստամարաթոնի ընթացքում ստացված միջոցները»,- ասված է հաղորդագրության մեջ։
Հաղորդվում է, որ մարզպետը ներկայացրել է նաև մարզի բնակիչների կենցաղային պայմանների բարելավման նպատակով հաստատված և արդեն մեկնարկած ծրագրերի իրականացման փուլերը։
Նախագահ Վահագն Խաչատուրյանը կարևորել է Սյունիքում իրականացվող աշխատանքների շարունակականությունն ու արդյունավետությունը՝ ընդգծելով, որ մարզի կայուն զարգացումը շարունակում է մնալ պետական քաղաքականության առաջնահերթություններից։
