09.06.2026 | 11:02
Վահագն Ալեքսանյանի ճեպազրույցը՝ ՈՒՂԻՂ
ԱՄՆ-ն ԵՄ երկրներին կոչ է արել չօգտագործել ռուսական ակտիվներն Ուկրաինային օգնելու համար. Bloomberg
Քաղաքականություն
05.12.2025 | 18:23
Bloomberg-ի հետ զրուցած մի քանի եվրոպացի դիվանագետներ ասել են, որ Միացյալ Նահանգները փորձել է համոզել մի քանի եվրոպական երկրների՝ չաջակցել Եվրոպայում սառեցված ռուսական ակտիվների օգտագործման նախագծին 2026-2027 թվականներին Ուկրաինային օգնելու համար, գրում է BBC-ի ռուսական ծառայությունը։
ԱՄՆ պաշտոնյաների կարծիքով՝ Ուկրաինային տրամադրվող, այսպես կոչված, 90 միլիարդ եվրոյի «փոխհատուցման վարկի» համար ակտիվների (առաջին հերթին՝ Ռուսաստանի Կենտրոնական բանկի) օգտագործումը կարող է բացասաբար անդրադառնալ Մոսկվայի՝ Կիևի հետ խաղաղության շուրջ բանակցություններ վարելու պատրաստակամության վրա։
Պաշտոնյաները չեն նշել, թե որ երկրներին նկատի ունեն։ ԵՄ-ում կա առնվազն երկու երկիր, որոնք բարեկամաբար են տրամադրված Մոսկվայի նկատմամբ՝ Հունգարիան և Սլովակիան։ Բելգիան դեմ է ռուսական ակտիվների օգտագործմանը, քանի որ այնտեղ է գտնվում Euroclear դեպոզիտարիան, որտեղ դրանք պահվում են։
Այսպես կոչված, «Թրամփի խաղաղության ծրագրի» առաջին նախագիծն առաջարկում էր օգտագործել առնվազն որոշ սառեցված ռուսական ակտիվներ՝ Ուկրաինայի զարգացման համար ներդրումային հիմնադրամ ստեղծելու նպատակով, որից ԱՄՆ-ը կստանար շահույթի մի մասը։ Հետագայում Ուկրաինայի և ԱՄՆ-ի ներկայացուցիչների միջև բանակցությունների ընթացքում ծրագիրը փոփոխվեց, սակայն Մոսկվան չհամաձայնվեց փոխզիջումային տարբերակի հետ։
Կիևին օգնելու համար Եվրոպայում գտնվող ռուսական ակտիվների օգտագործման հարցը, ինչպես սպասվում է, կքննարկվի դեկտեմբերի 19-ին կայանալիք ԵՄ գագաթնաժողովում։
Հոկտեմբերին կայացած նախորդ գագաթնաժողովում եվրոպացի առաջնորդները չէին կարողացել համաձայնության գալ այս հարցի շուրջ։
Թարգմանությունը՝ Էմմա Չոբանյանի
