29.07.2026 | 14:27
Զելենսկին հայտնել է Ռյազանի և Պերմի նավթավերամշակման գործարաններին հարվածների մասին
Մեծ Բրիտանիան պատրաստ է Ուկրաինային փոխանցել 10,6 միլիարդ դոլարի ռուսական սառեցված ակտիվները
Քաղաքականություն
05.12.2025 | 15:27
Մեծ Բրիտանիան պատրաստ է Ուկրաինային փոխանցել 8 միլիարդ ֆունտ սթերլինգի (շուրջ 10,6 միլիարդ դոլար) սառեցված ռուսական ակտիվները, հայտնում է The Times-ը։
«Մեզ անհրաժեշտ է ծրագիր, որը կօգտագործի ռուսական ակտիվները ոչ միայն կարճաժամկետ հեռանկարում Ուկրաինային աջակցելու, այլև Ռուսաստանին ուժեղ ուղերձ հղելու համար»,- ասել է երկրի ԱԳՆ ղեկավար Իվետ Կուպերը։
Նա նաև ՌԴ նախագահ Վլադիմիր Պուտինին անվանել է Մեծ Բրիտանիայի անվտանգության համար «ակտիվ սպառնալիք», գրում է The Insider-ը։
Ռուսական ակտիվներն Ուկրաինային փոխանցումը, ինչպես սպասվում է, կլինի Կիևի համար միջազգային օգնության փաթեթի մի մասը, որը Մեծ Բրիտանիան պատրաստում է Եվրամիության և Կանադայի հետ համատեղ: Ընդհանուր գումարը կարող է հասնել մինչև 130 միլիարդ դոլարի, որը կծածկի Ուկրաինայի ֆինանսական կարիքների ավելի քան երկու երրորդը հաջորդ երկու տարիների համար։
Ակտիվների փոխանցման ճշգրիտ մեխանիզմը դեռևս համաձայնեցված չէ: Ծրագրերը քննարկվել են դեկտեմբերի 3-ին Բրյուսելում ՆԱՏՕ-ի արտաքին գործերի նախարարների հանդիպման ժամանակ:
Ավելի վաղ Եվրոպական կենտրոնական բանկը (ԵԿԲ) հրաժարվել էր երաշխավորել Ուկրաինային տրամադրվող 140 միլիարդ եվրոյի փոխհատուցման վարկը, որը պետք է ապահովվեր բելգիական Euroclear պահոցում սառեցված ռուսական ակտիվներով։ Բելգիայի արտաքին գործերի նախարարը Եվրամիությանը մեղադրել է առաջարկվող ծրագրի բացասական հետևանքները թերագնահատելու մեջ։
Բելգիայի իշխանությունները մտավախություն ունեն, որ եթե Ռուսաստանի Կենտրոնական բանկի դեմ պատժամիջոցները չեղարկվեն, և Ռուսաստանը պահանջի իր ակտիվների վերադարձ, դրանք ստիպված կլինեն վերադարձվել կա՛մ Euroclear-ի կապիտալից, կա՛մ անմիջապես Բելգիայի բյուջեից: Սառեցված ակտիվները կազմում են գրեթե Բելգիայի տարեկան բյուջեի համարժեքը, ուստի դրանց վերադարձը կնշանակի երկրի սնանկացում:
Թարգմանությունը՝ Էմմա Չոբանյանի
