02.10.2026 | 11:25
Փաշինյանի երեկվա դիրքորոշումից հետո Հ1-ը հայտնում է՝ որևէ աշխատակից պատասխանատվության չի ենթարկվի սեպտեմբերի 27-ի համերգի համար
The New York Times-ը դատի կտա Պենտագոնին՝ լրատվամիջոցների նկատմամբ սահմանափակումների համար
Քաղաքականություն
04.12.2025 | 22:35
The New York Times-ը հայտարարել է Վաշինգտոնի դաշնային շրջանային դատարան դատական հայց ներկայացնելու մտադրության մասին՝ լրագրողների աշխատանքի վրա այս աշնանը սահմանված սահմանափակումների վերաբերյալ: Պարբերականը կարծում է, որ այդ սահմանափակումները հակասահմանադրական են, գրում է The Insider-ը։
Հոկտեմբերի կեսերից ուժի մեջ մտած նոր կանոնների համաձայն՝ լրագրողներին արգելվում է տեղեկատվություն հավաքել և հրապարակել առանց գերատեսչության պաշտոնական թույլտվության՝ նրանց հավատարմագրումը չեղյալ համարելու սպառնալիքով։ Ամերիկյան մի քանի խոշոր լրատվամիջոցներ, այդ թվում՝ The New York Times-ը, հրաժարվել են կատարել այս պահանջները։
Իր հայտարարության մեջ NYT-ը պնդում է, որ Պենտագոնի ղեկավարության կողմից հայտարարված կանոնները խախտում են ԱՄՆ Սահմանադրության Առաջին փոփոխությունը, որը երաշխավորում է խոսքի ազատությունը: Հայցում նշվում է, որ Պենտագոնի քաղաքականության նպատակն է «փակել Պենտագոնի դռները՝ մամուլի համար պատմականորեն բաց տարածքները այն լրատվական կազմակերպությունների համար, որոնք առանց վախի կամ բարեհաճության հետաքննում և հաղորդում են գերատեսչության և նրա ղեկավարության գործողությունների մասին»:
NYT-ը մտադիր է դատարանին խնդրել այս կանոններն անօրինական ճանաչել և Պենտագոնին պարտավորեցնել չեղյալ համարել դրանք: CNN-ը, հղում անելով իրավաբաններին, հաղորդում է, որ NYT-ն առաջին լրատվականն է, որը դատական հայց է ներկայացրել Պենտագոնի դեմ, սակայն սպասվում է, որ մյուս լրատվական խմբագրություններն աջակցող հայտարարություններ կանեն:
Սեպտեմբերի վերջին Պաշտպանության նախարարությունը նոր պահանջներ է ուղարկել լրատվամիջոցներին՝ գործնականում պարտավորեցնելով նրանց տարածել միայն այն տեղեկատվությունը, որը համաձայնեցված է նախարարության հետ։ Լրատվամիջոցների և իրավապաշտպան խմբերի հետ բանակցություններից հետո պահանջները մեղմացվել են. լրագրողները ստիպված էին պայմանագիր կնքել Պենտագոնի հետ, հակառակ դեպքում՝ կզրկվեին հավատարմագրումից։
Պաշտպանության նախարար Փիթ Հեգսեթը, իր հերթին, Պենտագոն մուտքը X-ում անվանել էր «արտոնություն, այլ ոչ թե իրավունք»՝ նշելով, որ նոր կանոններն արգելում են մամուլին «ազատորեն շրջել» Պենտագոնի միջանցքներով և պահանջում են, որ թղթակիցները «կրեն տեսանելի նշան», որը ցույց է տալիս իրենց կապը հրատարակության հետ։ Սակայն լրագրողներն այդ ժամանակ նշել էին, որ մամուլն արդեն իսկ պահպանել է այդ կանոնները, և որ դրանք անհրաժեշտ չեն։
Թարգմանությունը՝ Էմմա Չոբանյանի
