25.12.2025 | 23:38
Ճապոնիայում 5,6 մագնիտուդով երկրաշարժ է գրանցվել
Զախարովան անդրադարձել է ԵՄ-ՀՀ գործակցությանը` Կալլասին ու Կոսին անվանելով «բրյուսելյան վամպիրներ»
Քաղաքականություն
04.12.2025 | 16:47
ՌԴ ԱԳՆ պաշտոնական ներկայացուցիչ Մարիա Զախարովան այսօրվա ճեպազրույցում անդրադարձել է Բրյուսելում օրերս Հայաստանի ու ԵՄ-ի միջև փաստաթղթի ստորագրմանն ու ԵՄ դիվանագիտության ղեկավար Կայա Կալլասի և ընդլայնման հարցերով հանձնակատար Մարթա Կոսի հայտարարություններին։
Նրանք նշել էին, որ ԵՄ-ն Հայաստանին գումար է հատկացնում, քանի որ խորհրդարանական ընտրություններից առաջ երկիրը բախվում է լուրջ տեղեկատվական մարտահրավերների, «Ռուսաստանը և դրա հետ կապված կառույցները երկրում անցկացնում են ապատեղեկատվական արշավներ՝ նման այն արշավներին, որոնք անցկացվել են Մոլդովայում»։ Բրյուսելը նաև աջակցելու է Երևանին ՌԴ-ից էներգետիկ կախվածության նվազման հարցում։
Մեկնաբանելով եվրոպացի պաշտոնյաների հայտարարությունները՝ Զախարովան կտրուկ քննադատել է Կալլասին և Կոսին՝ նրանց անվանելով «բրյուսելյան վամպիրներ» հետ, որոնք «առաջարկում են, որ մյուսները դառնան իրենց նման՝ չարտացոլվեն հայելիներում և չվախենան արևի լույսից, էներգիայից և իշխանությունից»։ Ըստ նրա՝ դա ցույց է տալիս, որ ԵՄ-ի՝ Երևանի հետ հարաբերություններում հիմնական նպատակը «հայ-ռուսական կապերի խաթարումն է, այլ ոչ թե տարածաշրջանում խաղաղության կամ զարգացման խթանումը»։
«Այս հայտարարությունը ապացուցում է, որ ԵՄ-ի միակ նպատակը Ռուսաստանի և Հայաստանի միջև հարաբերությունները վնասելն է: Նրանք արդեն դադարել են թաքցնել սա, և գուցե կարող էին, բայց մտավոր ունակությունները թույլ չի տալիս դա անել: Ի՞նչ վնաս են տեսել հայ սպառողները ռուս-հայկական էներգետիկ համագործակցությունից: Ոչինչ»,- հայտարարել է ՌԴ ԱԳՆ ներկայացուցիչը՝ նշելով, որ օգտագործում են պատժամիջոցները՝ իրենց հսկողության տակ պահելու հայ-ռուսական ներդրումային, առևտային գործակցությունը, և դա Մոսկվան համարում է միջամտություն ինքնիշխան երկրի գործերին:
Թարգմանությունը՝ Էմմա Չոբանյանի
