Խրախուսեք չծխող զինծառայողներին․ Հայկ Սարգսյանը՝ Սուրեն Պապիկյանին․ ՏԵՍԱՆՅՈՒԹ

«Մեկ ամիս առաջ Ձեզ ուղղված գրության մեջ առաջարկներ եմ ներկայացրել, որոնց մի մասը կցանկանայի այժմ քննարկել։ Ի պատասխան իմ հարցման՝ Դուք նշել եք, որ բանակում ծխում է ժամկետային զինծառայողների 67%-ը, որոնց զգալի մասը սկսել է ծխել զորակոչվելուց հետո։ Ենթասպայական կազմի մոտ այդ ցուցանիշը 69% է, իսկ սպայականի մոտ՝ 87%։ Այս թվերը խիստ մտահոգիչ են»,- ԱԺ-ում պարտադիր ժամկետային զինվորական ծառայության ժամկետը 24-ից 18 ամիս դարձնելու մասին օրինագծի քննարկման ժամանակ դիմելով պաշտպանության նախարար Սուրեն Պապիկյանին՝ ասաց ՔՊ խմբակցության պատգամավոր Հայկ Սարգսյանը։

Պատգամավորն առաջարկեց խրախուսական նորմ սահմանել այն զինծառայողների համար, որոնք չեն ծխում, օրինակ՝ նրանց ավելի շուտ զորացրելու կամ լրացուցիչ արձակուրդ տրամադրելու տեսքով։

«Լրացուցիչ արձակումների հարցը, գուցե, քննարկելի է, սակայն ծառայության ժամկետի կրճատումն այս փուլում քննարկելի չէ։ Ես ինքս չեմ ծխում և կիսում եմ Ձեր մտահոգությունը հասարակության մեջ ծխելու տարածվածության վերաբերյալ։ Սակայն ցանկացած արգելք պետք է լինի իրավաչափ։ Եթե խոսքը վերաբերում է չափահաս անձանց, ապա սա ավելի լայն քննարկման կարիք ունի։ Եթե հասարակության մեջ լինի համապատասխան ըմբռնում, հնարավոր է ծխախոտի վաճառքի տարիքը բարձրացնել մինչև 21 կամ 25 տարեկան։ Խնդրում եմ չառանձնացնել զինվորականությանը, քանի որ այն հասարակության մասն է, և նման տարանջատումը դրական չի ընկալվի»,- նշեց Պապիկյանը։

Մանրամասները՝ տեսանյութում։

Եվգենյա Համբարձումյան