05.10.2026 | 19:36
Զելենսկին հայտնել է, որ ՌԴ-ն ԱԹՍ-ներով հարվածել է Թուրքիային պատկանող նավի, որում Ադրբեջանի քաղաքացիներ են եղել
ՀՀ-ում երեխայի ծննդյան կապակցությամբ կտրամադրվի 4 նպաստ՝ 3-ի փոխարեն․ ՏԵՍԱՆՅՈՒԹ
Հասարակություն
01.12.2025 | 14:32
Կսահմանվի պետական նպաստի նոր տեսակ՝ երրորդ և յուրաքանչյուր հաջորդ երեխայի նպաստը։ Բովանդակային առումով այն կլինի Կառավարության 2021 թվականի որոշմամբ սահմանված՝ ընտանիքում 3-րդ և յուրաքանչյուր հաջորդ երեխայի ծննդյան կապակցությամբ տրվում է ամսական 50000 դրամի չափով աջակցության շարունակությունը։ Աշխատանքի և սոցիալական հարցերի նախարարության կենսաթոշակային ապահովության և այլ դրամական վճարների վարչության պետ Անահիտ Գալստյանւ ներկայացմամբ՝ օրենքի ընդունումից հետո արդեն ՀՀ օրենսդրությամբ երեխայի ծննդյան կապակցությամբ կտրամադրվի չորս նպաստ՝ նախկին երեքի փոխարեն։
«Առաջինը, բնականաբար, մայրության նպաստն է տրվում հղի կնոջը, ընդ որում՝ թե՛ աշխատող, թե՛ չաշխատող մայրերին։ Երկրորդը տրվում է երեխայի ծնվելուց, արդեն մյուս երեքը տրամադրվում են երեխայի ծնվելուց հետո՝ երեխայի ծննդյան միանվագ նպաստը, մինչև երկու տարեկան երեխայի խնամքի նպաստը, և այս չորրորդ տեսակը, որ կներմուծվի օրենքի ընդունմամբ, երրորդ և յուրաքանչյուր երեխայի պետական նպաստը»,- նշեց նա։
Բացի այդ, 2026 թվականի սեպտեմբերի 1-ից Հայաստանում երեխայի ծննդյան միանվագ նպաստը կսահմանվի 500,000 դրամ՝ անկախ երեխայի կարգաթվից։
«Մինչ այժմ ծննդյան միանվագ նպաստը տրվում էր՝ կախված կարգաթվից։ Առաջին, երկրորդ երեխաների համար այսօր էլ տրամադրվում է 300,000-ական դրամ, երրորդ և չորրորդ երեխաների դեպքում՝ 1-ական միլիոն դրամ, հինգ և ավելի երեխայի դեպքում՝ 1 միլիոն 500 հազար դրամ։ Սա երեխայի ծննդյան միանվագ նպաստի գործող համակարգն է։ Օրենքի ընդունումից հետո, անկախ կարգաթվից, կտրամադրվի 500 հազարական դրամ։ Իսկ կարգաթվից կախված՝ արդեն կվճարվի բացառապես երրորդ և յուրաքանչյուր երեխայի կապակցությամբ տրվող պետական նպաստ»,- նշեց Գալստյանը։
Նրա խոսքով՝ ուսումնասիրություն է կատարվել, պարզվել է, որ միջոցառումը դրական ազդեցություն է ունենում ժողովրդագրական իրավիճակի վրա։
Մանրամասները՝ տեսանյութում։
Եվգենյա Համբարձումյան
