Սուրբ Սարգիս եկեղեցում Փաշինյանին դիմավորել է Նավասարդ արքեպիսկոպոս Կճոյանը

Առաջնորդանիստ Սուրբ Սարգիս եկեղեցում մեկնարկել է կիրակնօրյա պատարագը, որին մասնակցում են ինչպես վարչապետ Նիկոլ Փաշինյանը, այնպես էլ գործարար Սամվել Կարապետյանի եղբորորդին, «Մեր ձևով» քաղաքական շարժման համակարգող Նարեկ Կարապետյանը։

Նշենք, որ Փաշինյանի հետ եկեղեցի են ժամանել նաև Երևանի քաղաքապետ Տիգրան Ավինյանը, ԱԺ փոխխոսանկ Ռուբեն Ռուբինյանը, էկոնոմիկայի նախարար Գևորգ Պապոյանը, արդարադատության նախարար Սրբուհի Գալյանը, ԱԳ նախարար Արարատ Միրզոյանը, առողջապահության նախարար Անահիտ Ավանեսյանը, պատգամավոր Վահագն Ալեքսանյանը և այլք։

Խորանի մոտ Փաշինյանին դիմավորել է Արարատյան Հայրապետական Թեմի առաջնորդական փոխանորդ Տ. Նավասարդ արքեպիսկոպոս Կճոյանը։ Համացանցում տեղեկություն էր տարածվել, որ պատարագը պետք է մատուցի Տեր Արարատ քահանա Պողոսյանը։ Սակայն վերջինս հայտարարություն է տարածել ու նշել՝ պատարագիչ քահանան Երևանի Ս. Երրորդություն եկեղեցու սպասավոր Արարատ քահանա Օրդոյանն է։

«Ես՝ Արարատ քահանա Պողոսյանս, հայտարարում եմ, որ երբեք չեմ զեղջի Ամենայն հայոց կաթողիկոսի անունը և երբեք չեմ միաբանի հայրենիքն ու հավատքն ուրացածների և պառակտիչների հետ։ Իմ ուխտը Սուրբ Էջմիածնի և նրա ազգընտիր Գահակալը անխախտ, անսակարկ ու անբեկանելի է»,-նշել էր նա։

Հիշեցնենք՝ նոյեմբերի 27-ին վարչապետ Նիկոլ Փաշինյանը Կառավարությունում հանդիպում է ունեցել Հայաստանյայց Առաքելական Սուրբ Եկեղեցու մի խումբ եպիսկոպոսների հետ։ Մասնավորապես, հանդիպմանը մասնակցել են Տեր Աբրահամ արքեպիսկոպոս Մկրտչյանը, Տեր Առաքել արքեպիսկոպոս Քարամյանը, Տեր Վազգեն արքեպիսկոպոս Միրզախանյանը, Տեր Անուշավան եպիսկոպոս Ժամկոչյանը, Տեր Վրթանես եպիսկոպոս Աբրահամյանը, Տեր Նավասարդ արքեպիսկոպոս Կճոյանը, Տեր Առաքել եպիսկոպոս Տիգրանյանը, Տեր Գեւորգ եպիսկոպոս Սարոյանը։

Հանդիպմանը նախորդել է եպիսկոպոսաց հայտարարությունը, որում նշվում էր՝ Արշակ արքեպիսկոպոս Խաչատրյանին վերագրվող ինտիմ տեսանյութերը իրական են, իսկ կաթողիկոսը հարցն ուսումնասիրող հանձնախմբից այդ մասին իմանալով ոչինչ չի արել։

Երեկ էլ արդեն 10 եպիսկոպոսներ են հայտարարություն տարածել ու նշել․ «Ակնկալում ենք, որ Գարեգին Բ Կաթողիկոսը, ի սեր մեր եկեղեցու և մեր ժողովրդի, սթափ կգնահատի ստեղծված իրավիճակը, չի տանի մեր ազգն ու մեր եկեղեցին ավելորդ ցնցումների, կամովին հանգստյան կկոչվի և այդ կերպ հնարավոր կլինի նոր ընտրություններ կազմակերպել»:

Եվգենյա Համբարձումյան

Տեսանյութերը՝ այստեղ։