Ռուսական դատարանը Նավալնիի Կոռուպցիայի դեմ պայքարի հիմնադրամն «ահաբեկչական կազմակերպություն» է ճանաչել

ՌԴ Գերագույն դատարանը բանտում մահացած ռուս ընդդիմադիր գործիչ Ալեքսեյ Նավալնիի Կոռուպցիայի դեմ պայքարի հիմնադրամի ամերիկյան իրավաբանական անձը ճանաչել է «ահաբեկչական կազմակերպություն» և արգելել դրա գործունեությունը Ռուսաստանում, փոխանցում է Meduza-ն:

Ռուսաստանի գլխավոր դատախազությունը դատական ​​հայց էր ներկայացրել Anti-Corruption Foundation International, Inc. կազմակերպության արգելման վերաբերյալ: Դատավարությունն անցկացվել է դռնփակ ռեժիմով։

Գործը քննել է դատավոր Օլեգ Նեֆեդովը: Նա, ի թիվս այլ բաների, հայտնի է նրանով, որ Ռուսաստանում գոյություն չունեցող «միջազգային ԼԳԲՏ շարժումը» և «միջազգային սատանիզմի շարժումը» ծայրահեղական է հայտարարել: Դատավորը նաև ավելի վաղ մերժել է Ալեքսեյ Նավալնիի կողմից Ռուսաստանի արդարադատության նախարարության դեմ ներկայացված երեք դատական ​​հայցերը։

Ալեքսեյ Նավալնիի թիմը հայտարարություն է հրապարակել՝ մեկնաբանելով Գերագույն դատարանի որոշումը։

«Սա է Ռուսաստանի իշխանությունների քաղաքական տեխնոլոգիան է՝ պետության թշնամի հայտարարել յուրաքանչյուրին, որը խանգարում է իրենց գողությանը և անվերջ պատերազմին։ Մենք ահաբեկիչներ չենք, և բոլորը հասկանում են դա։ Մենք և մեր կողմնակիցները հասկանում ենք դա։ Դա հիանալի հասկանում են նրանք, որոնք ստորագրում են նման որոշումները։ Ահաբեկիչները Վլադիմիր Պուտինն ու նրա կամակատարներն են՝ մարդիկ, որոնք սանձազերծել են պատերազմը, սպանում են քաղաքացիական անձանց և քաղաքական հակառակորդներին, բանտարկում մարդկանց»,- ասվում է հայտարարության մեջ։

Թարգմանությունը՝ Էմմա Չոբանյանի