29.07.2026 | 16:10
Նեյմարն ավարտեց կարիերան Բրազիլիայի հավաքականում
ԱՄՆ-ը դադարեցնում է Աֆղանստանի քաղաքացիների ներգաղթի դիմումների քննումը՝ Սպիտակ տան մոտակայքում հարձակումից հետո
Քաղաքականություն
27.11.2025 | 13:26
ԱՄՆ քաղաքացիության և ներգաղթի ծառայությունը (USCIS) հայտարարել է, որ անորոշ ժամանակով դադարեցնում է Աֆղանստանի քաղաքացիներին վերաբերող բոլոր ներգաղթային դիմումների մշակումը: USCIS-ի հայտարարության մեջ նշվում է, որ դադարեցվում են բոլոր ներգաղթային գործընթացները «անորոշ ժամանակով՝ մինչև անվտանգության և ստուգման արձանագրությունների հետագա վերանայումը», գրում է Current time-ը։
Հայտարարությունը հրապարակվել է Վաշինգտոնում Սպիտակ տան մոտակայքում Ազգային գվարդիայի երկու զինվորականի վրա հարձակումից հետո։ Նրանք ծայրահեղ ծանր վիճակում են։
Կասկածյալը կալանքի տակ է. նա նույնպես հրազենային վնասվածքներ է ստացել: ԱՄՆ ներքին անվտանգության նախարարությունը հայտնել է, որ հարձակվողն Աֆղանստանի քաղաքացի է, «շատերից մեկը, ովքեր չեն ենթարկվել ստուգման և զանգվածաբար ընդունվել են Միացյալ Նահանգներ 2021 թվականին՝ Աֆղանստանից ԱՄՆ զորքերի դուրսբերումից հետո»: Այդ ժամանակ ԱՄՆ իշխանությունները թույլատրել էին մուտք գործել հազարավոր աֆղանցիների, որոնք նախկինում համագործակցել էին ԱՄՆ-ի հետ Աֆղանստանում, և որոնք վտանգի տակ էին Թալիբանի իշխանության գալուց հետո:
Դոնալդ Թրամփի վարչակազմը նախկինում բազմիցս պնդել է, որ այդ անձինք պատշաճ կերպով չեն ստուգվել, և որ նրանց թվում կարող են լինել ահաբեկչական խմբավորումների անդամներ կամ արմատական գաղափարախոսությունների կողմնակիցներ:
Reuters-ի տվյալներով՝ հարձակվողը 29-ամյա Աֆղանստանի քաղաքացի է, նրա դրդապատճառները հայտնի չեն։ Նա ապաստան է խնդրել Միացյալ Նահանգներից 2024 թվականի դեկտեմբերին, դիմումը հաստատվել է 2025 թվականի ապրիլի 23-ին։ Գործակալությունը հայտնում է, որ կասկածյալը քրեական անցյալ չի ունեցել։
Հիշեցնենք՝ հարձակումից հետո Թրամփը հայտարարել էր, որ դա «ահաբեկչական ակտ» է։
Թարգմանությունը՝ Էմմա Չոբանյանի
