Քաղաքականություն
25.11.2025 | 21:37
Թուրքիայի անվտանգության ուժերն Արաբական Միացյալ Էմիրությունների հետախուզական ծառայության համար աշխատելու կասկածանքով երեք անձի են ձերբակալել, հայտնել է Ստամբուլի գլխավոր դատախազությունը, գրում է Middle East Eye-ը։
Գերատեսչությունը հայտարարել է, որ կասկածյալները, ենթադրաբար, թուրքական հեռախոսահամարի միջոցով հավաքագրել են Թուրքիայի կարևոր պետական մարմիններում աշխատող անձանց անձնական տեղեկություններ։
«Պարզվել է, որ ԱՄԷ հետախուզական ծառայության անդամները Թուրքիայում գործող GSM (բջջային կապի գլոբալ համակարգ) ընկերությունից համար են ստացել և կեղծ էջերի միջոցով փորձել են հավաքել մեր երկրում կարևոր պաշտոններում աշխատող անձնակազմի կենսագրական տվյալներ»,- ասվում է հայտարարության մեջ։
Նշվում է, որ աշխատանքներն ուղղված են եղել պաշտպանական արդյունաբերության կազմակերպությունների ղեկավարների, ԱԳՆ-ի կողմից օգտագործվող հեռախոսագծի և որոշ օտարերկրյա պետությունների պաշտոնական ներկայացուցիչների դեմ։ Հայտարարության մեջ նաև նշվում է, որ իշխանությունները նույնականացրել են չորս անձանց, որոնք թուրքական օպերատորից ձեռք են բերել բջջային հեռախոսագիծ և տեղափոխել այն ԱՄԷ՝ հետախուզական գործակալին հասցնելու համար, և պահպանել են կապը միմյանց հետ։
«Այսօր բացահայտված կասկածյալներին ձերբակալելու և հանցագործության հետ կապված ապացույցներ առգրավելու նպատակով անցկացված գործողության ընթացքում կալանավորվել է երեք կասկածյալ, ևս մեկը մնում է արտասահմանում։ Թուրքիայից դուրս գտնվող կասկածյալի նկատմամբ կալանքի օրդեր է տրվել»,- հայտնել է դատախազությունը։
Թուրքիան և ԱՄԷ-ն հարաբերությունները վերականգնել են 2021 թվականին՝ «Արաբական գարնան» պատճառով առաջացած տարածաշրջանային և երկկողմ տարաձայնությունները լուծելու համար ծավալուն բանակցություններից հետո։ Սակայն վերջին ամիսներին Սուդանի պատերազմը վերստին բորբոքել է տարածաշրջանային տերությունների միջև լարվածությունը։
Վերջին տարիներին Թուրքիան ձերբակալել է բազմաթիվ կասկածյալների, որոնք, ենթադրաբար, աշխատում են իսրայելական, ռուսական կամ իրանական հետախուզական գործակալությունների համար։
Թարգմանությունը՝ Էմմա Չոբանյանի
