02.10.2026 | 11:15
Ադրբեջանը սպասում է ՀՀ Սահմանադրության փոփոխություններին, որից հետո խաղաղության համաձայնագիրն իրականություն կդառնա․ Հաջիև
ՀՀ-ում մոտավորապես 188.000 վարձու աշխատող համարվում է «աշխատող աղքատ»․ Հերիքնազ Տիգրանյան
Հասարակություն
25.11.2025 | 16:25
«Կառավարության ծրագրում մենք ֆիքսել ենք՝ 2026 թվականին նվազագույն աշխատավարձը դարձնել 85,000 դրամ»,- այս մասին «Նվազագույն աշխատավարձը և սոցիալ-տնտեսական իրողությունները Հայաստանի Հանրապետությունում» թեմայով քննարկման ժամանակ ասաց ԱԺ աշխատանքի և սոցիալական հարցերի մշտական հանձնաժողովի նախագահ Հերիքնազ Տիգրանյանը։
«Ցավոք, այս տարվա բյուջեի քննարկումների արդյունքում մենք այդ մեր դրած նպատակին չենք կարողանում հասնել, որովհետև ոչ միայն սոցիալական, այլև տնտեսական բաղադրիչն ենք հաշվի առնում, բայց բյուջեի նախագծով նախատեսված է հետվճարի համակարգ, բոլորիդ համար։ Գիտեք, որ հետվճարի մեխանիզմը մենք որպես կենսաթոշակի բարձրացման կամ նպաստի բարձրացման գործիք դրեցինք անկանխիկ եղանակով գնումների համար միայն թոշակառուների դեպքում։ Մենք հիմա նախատեսում ենք, որ դա կտարածվի նաև մյուսների վրա, այսինքն՝ անկանխիկ գնումների դեպքում քաղաքացիներն այն կստանան։ Հիմա տոկոսը չասեմ, որովհետև բյուջեն դեռ առաջին ընթերցումով է անցել, գուցե քննարկման արդյունքում թիվը փոխվի, բայց ինչ-որ X տոկոս հետվճար»,- նշեց նա։
Հիշեցնենք՝ 2026-ի պետական բյուջեի նախնական քննարկման ժամանակ վարչապետ Նիկոլ Փաշինյանը հայտարարել էր, որ հունվարի 1-ից ներդրվելու է համընդհանուր հետվճարի համակարգ․ բոլոր քաղաքացիներն անկանխիկ առևտրի դեպքում 2 տոկոս հետվճար են ստանալու։
«Մյուս տարի գուցե մեր հարկաբյուջետային քաղաքականությունն այնքան էֆեկտիվ կլինի, որ մենք կկուտակենք այդ միջոցները, և գուցե տարվա կեսին կանենք վերանայում, որովհետև մենք ունեցել ենք նման վիճակ, տարվա կեսին ենք թոշակի և նպաստի բարձրացում արել, և նաև աշխատավարձի բարձրացում»,- նշեց Տիգրանյանը։
Նրա խոսքով՝ Հայաստանի Հանրապետությունում մոտավորապես 188.000 վարձու աշխատող համարվում է «աշխատող աղքատ», որովհետև իրենք ստանում են նվազագույն աշխատավարձը։
«Մենք հասկանում ենք, որ այդ նվազագույն աշխատավարձը չի կարող ապահովել արժանապատիվ կյանք, բայց այս կատեգորիաների համար և ավելի ծայրահեղ աղքատների համար կան այլ առաջարկներ և ծրագրեր՝ զբաղվածության ծրագիրն է, պետության սոցիալական աջակցության ծրագրերն են, ընտանեկան անապահովության գնահատման օրենսդրական համակարգի արդյունքում սոցիալական աջակցության ծրագրերն են»,-նշեց հանձնաժողովի նախագահը։
Եվգենյա Համբարձումյան
