Յուրա Մովսիսյան․ Անհնար է նկարագրել, թե որքան շատ բան է Նիկիտա Սիմոնյանն արել «Սպարտակի» և հայ ժողովրդի համար

Հայաստանի ազգային հավաքականի և Մոսկվայի «Սպարտակի» նախկին հարձակվող Յուրա Մովսիսյանը արժանին է մատուցել 99 տարեկանում կյանքից հեռացած լեգենդար ֆուտբոլիստ և մարզիչ Նիկիտա Սիմոնյանին։

«Ես հնարավորություն եմ ունեցել անձամբ շփվելու Նիկիտա Սիմոնյանի հետ։ Նա լեգենդ էր ինձ համար և ամբողջ հայ ժողովրդի համար։ Շատ տխուր լուր է, ցավում եմ։ Ինձ համար մեծ պատիվ էր նրան ճանաչելը և նրա հետ շփվելը։ Անհնար է նկարագրել, թե որքան շատ բան է նա արել «Սպարտակի» և հայ ժողովրդի համար։ Սիմոնյանը բոլորին ապացուցեց, որ մեծ արժանիքներով մարդ է։

Առաջին անգամ մենք հանդիպեցինք իմ՝ «Սպարտակում» նորամուտի խաղից հետո, երբ ես հեթ-տրիկ էի գրանցել «Տերեկի» դեմ մրցավեճում։ «Զենիթի» դեմ խաղում իմ հեթ-տրիկից հետո նույնպես հանդիպեցինք և շփվեցինք, այդ ժամանակ ես իմ մարզաշապիկը նվիրեցի Նիկիտա Պավլովիչին։ Նա միշտ խորհուրդներ էր տալիս՝ ինչպես ավելի լավ գործել, և մեծ հարգանքով էր վերաբերվում բոլորին։ Ինձ համար Սիմոնյանի հետ շփումը մեծ հպարտություն էր»,- Յուրա Մովսիսյանի խոսքը մեջբերում է Metaratings-ը։

Ռուսաստանի ֆուտբոլային միության առաջին փոխնախագահ Նիկիտա Սիմոնյանը կյանքից հեռացել է նոյեմբերի 23-ին։ Հոկտեմբերի 12-ին նա դարձել էր 99 տարեկան։ Ֆուտբոլային կարիերայի ընթացքում Նիկիտա Սիմոնյանը խաղացել է Սուխումիի «Դինամոյում», Մոսկվայի «Սպարտակում» և «Կռիլյա Սովետովում»։ «Սպարտակի» հետ նա մարզիչի ու ֆուտբոլիստի կարգավիճակում դարձել է ԽՍՀՄ վեցակի չեմպիոն ու հնգակի գավաթակիր։ Սիմոնյանը նաև 160 գոլով «Սպարտակի» պատմության լավագույն ռմբարկուն է: ԽՍՀՄ-ի հավաքականի կազմում Նիկիտա Սիմոնյանը ոսկե մեդալակիր է դարձել 1958թ․ Մելբուրնի Օլիմպիական խաղերում։ Ֆուտբոլում ունեցած մեծ ավանդի համար 2000-ին նա արժանացել է ՖԻՖԱ-ի շքանշանի։ Մարզչական կարիերայի ընթացքում Նիկիտա Սիմոնյանը գլխավորել է ԽՍՀՄ հավաքականը, իսկ 1973-1974թթ․ աշխատել է «Արարատում»՝ դառնալով ԽՍՀՄ-ի չեմպիոն ու գավաթակիր: Նա երևանյան ակումբը գլխավորել է նաև 1984-1985թթ․: 1992 թվականից Նիկիտա Սիմոնյանը զբաղեցնում էր Ռուսաստանի ֆուտբոլային միության առաջին փոխնախագահի պաշտոնը։