Քելլոգը կհեռանա Ուկրաինայի հարցով ԱՄՆ հատուկ ներկայացուցչի պաշտոնից

ԱՄՆ նախագահի՝ Ուկրաինայի հարցերով հատուկ ներկայացուցիչ Քիթ Քելլոգը կհեռանա Դոնալդ Թրամփի վարչակազմից 2026 թվականի հունվարին, երբ լրանա նրա պաշտոնավարման ժամկետը։ Քելլոգը իր վստահելի անձանց տեղեկացրել է հրաժարական տալու մտադրության մասին։ Այս մասին գրել է Reuters-ը՝ հղում անելով չորս տեղեկացված աղբյուրների, փոխանցում է DW-ի ռուսական ծառայությունը։

Թոշակի անցնող գեներալ-լեյտենանտի հեռանալը կորուստ կլինի Կիևի համար, քանի որ նա համարվում էր Ուկրաինայի առանցքային աջակիցը Թրամփի վարչակազմում: Քելլոգն ավելի վճռական էր դատապարտում Ռուսաստանի հարձակումները Ուկրաինայի քաղաքացիական ենթակառուցվածքների վրա, քան ներկայիս վարչակազմի մյուս անդամները։

Ըստ լրատվամիջոցների հրապարակումների՝ Քելլոգը կոնֆլիկտ է ունեցել նախագահի մեկ այլ հատուկ ներկայացուցչի՝ Սթիվ Ուիթկոֆի հետ, որն առաջ է մղում նոր խաղաղության ծրագիրը, որը ներառում է Ուկրաինայից տարածքային զիջումներ:

Նախագահի հատուկ ներկայացուցիչը ժամանակավոր պաշտոն է Սպիտակ տան վարչակազմում՝ ոչ ավելի, քան 360 օր ժամկետով, որը կարող է երկարաձգվել Սենատի կողմից:

Ավելի վաղ Reuters-ն ու մի շարք այլ արևմտյան լրատվամիջոցներ հաղորդել էին Վաշինգտոնի պահանջների մասին, որոնք ուղղված են Ուկրաինային՝ զիջել երկրի արևելքում գտնվող տարածքները, կրճատել զինված ուժերի թվաքանակը և հրաժարվել որոշակի տեսակի զենքերից: Այս պահանջները ներառված են Թրամփի վարչակազմի՝ Ուկրաինայի դեմ Ռուսաստանի պատերազմը դադարեցնելու նոր ծրագրում։

Թարգմանությունը՝ Էմմա Չոբանյանի