Այն, որ Երևանում «Նիվա»-ներից անճաշակ երաժշտություն է հնչում, մենք ենք մեղավոր, մեր բացթողումն է. Իսպիրյան. ՏԵՍԱՆՅՈՒԹ

«Մեր երկրում ամեն լավ բան կատարվում է նկուղներում, այդտեղ կգտնես լավագույն կատարողներին, արխիվները, պահոցները: Ընդհատակում երբեմն հանդիպում եմ տաղանդների, որոնք, ցավոք, ստվերում են: Նրանց մեծ մասշտաբներ են պետք, որպեսզի սավառնեն, իսկ մեր երկիրը փոքր է: Միացյալ Նահանգներում, օրինակ, կան տաղանդների գործակալություններ, մեզ էլ են դրանք պետք, որպեսզի այդ տաղանդներին աճեցնենք ու ճանապարհ տանք»,- Factor TV-ի հետ զրույցում տեսակետ է հայտնում երգիչ Արթուր Իսպիրյանը:

Նա խոսում է նաև մայրաքաղաքում հնչող երաժշտության մասին և նկատում, որ, օրինակ, մեզ ազգային, ժողովրդական երգիչները, երաժիշտները պետք է պարբերաբար հանդես գան ակումբներում, որպեսզի մթնոլորտ ձևավորեն. «Այն բանի համար, որ նիվաներից հնչում է վատ, անճաշակ երաժշտություն, մենք ենք մեղավոր, մենք ենք մեղավոր, որ այդպիսի ճաշակ է ձևավորվել, մեր բացթողումն է դա»,- ասում է երգիչը:

Երևանի ավագանու նախկին անդամը անդրադառնում է նաև քաղաքային խնդիրների, մասնավորապես` հասարակական տրանսպորտի ծանրաբեռնվածության խնդրին. «Երևանում գնալով անհնար է դառնում մեքենա վարելը, վերջին 20 տարում այնքան մեքենա է ներմուծվել…Մի լուծում պետք է դրան տալ: Հուսամ` էլեկտրական մեքենաների քանակը կշատանա և կնվազի բենզինով, մեքենաների թիվը: Այլապես բենզինով մեքենաների կատալիզատորները հանում են, ֆիլտրում տեղի չի ունենում, և օդն աղտոտվում է»:

Մանրամասները`տեսանյութում:

Աննա Բաբաջանյան