Կրոնական հանդուրժողականությունը միշտ եղել է օրակարգային. Փաշինյան

Հայաստանի Հանրապետության առաջին Աղոթքի նախաճաշի շրջանակում վարչապետ Նիկոլ Փաշինյանը մասնակցել է պաշտոնական ընթրիքի՝ մի հարթակի, որտեղ մեկ սեղանի շուրջ համախմբվել էին Հայաստանում ներկայացված տարբեր կրոնական համայնքների ղեկավարներ, պետական և հասարակական գործիչներ, դիվանագիտական ու գործարար շրջանակների ներկայացուցիչներ։ Իր ելույթում վարչապետը ընդգծել է կրոնական հանդուրժողականության, փոխադարձ ճանաչման և սիրո վրա հիմնված շփումների կարևորությունը՝ շեշտելով, որ նման հանդիպումները նպաստում են խաղաղության, համերաշխության և ազատության արժեքներով առաջնորդվող հասարակության ձևավորմանը։

«Վարչապետը հանդես է եկել ելույթով և ողջունել Հայաստանի Հանրապետության առաջին Աղոթք նախաճաշի ֆորմատով տեղի ունեցող երեկոյի մասնակիցներին: Նիկոլ Փաշինյանը նշել է, որ յոթ տարի զբաղեցնելով Հայաստանի Հանրապետության վարչապետի պաշտոնը, առաջին անգամ է ներկա գտնվում այս ձևաչափով միջոցառմանը, որտեղ ներկա են Հայաստանյայց առաքելական Սուրբ եկեղեցու, եզդիական, հրեական, հայ կաթոլիկ, հայ ավետարանական համայնքների ներկայացուցիչներ, ասորական, ուղղափառ եկեղեցիների, մահմեդական և այլ հավատքի տեր մարդիկ: Իր խոսքում Նիկոլ Փաշինյանը նշել է, որ կրոնական հանդուրժողականությունը միշտ եղել է օրակարգային, և սա այն դեպքերից է, որ քաղաքականությունները, հայտարարությունները, որոշումներն այդ թվում պիտի վերածվեն կոնկրետ մարդկային շփումների: Երկրի ղեկավարը նաև հավելել է, որ այս շփումները շատ կարևոր են Հայաստանում կրոնական տարբեր համայնքների, ազգային փոքրամասնությունների հավատքին, կրոնին ծանոթանալու տեսանկյունից:

Հայաստանյան քաղաքացիական հասարակության կողմից կազմակերպված միջոցառման նպատակն է խթանել երկխոսությունը ու համագործակցությունը՝ դրա հիմքում ունենալով Հայաստանի պատմական, քրիստոնեական ինքնության, խաղաղության, բարոյական սկզբունքների վրա հիմնված առաջնորդության և կրոնական ազատությունը։ Աղոթքի նախաճաշի հեռահար նպատակն է ձևավորել տեսլական և Հայաստանը դիտարկել որպես կրոնական ազատությանն ու բարեկեցությանն ուղղված առաջատար երկրի դիտանկյունից, որն ունի հավատքի, գործընկերության, նորարարության և խաղաղության վրա հիմնված հասարակություն։ Աղոթքի նախաճաշ միջոցառմամբ Հայաստանի Հանրապետությունը միանում է համաշխարհային այն ավանդույթին, որը միավորում է առաջնորդներին՝ խորհրդածելու, աղոթելու և մեր ժամանակների մարտահրավերներին դիմակայելու համար բարոյական լուծումներ գտնելու»,- ասված է հաղորդագրությունում։