24.11.2024 | 19:08
ՃՏՊ Դիմիտրով գյուղի մոտ. 3 անձ տեղափոխվել է հիվանդանոց
Ո՞վ է Ֆիրդուսի շուկայի տարածքի սեփականատերը
19.07.2017 | 13:17
Factor.am-ը վաղ առավոտից ուղիղ հեռարձակմամբ ներկայացնում է Ֆիրդուսի շուկայում տիրող իրավիճակը:
Հիշեցնենք, որ առավոտյան ժամը 06.00-ից քաղաքապետարանի աշխատակիցները փորձել են սկսել տաղավարների ապամոնտաժման աշխատանքներ, սակայն հանդիպելով հարակից շենքերի բնակիչների և առևտրականների դիմադրությանը` առժամանակ դադարեցրել են գործընթացը։
Երևանի քաղաքապետարանի լրատվության և հասարակայնության հետ կապերի վարչության պետ Արթուր Գևորգյանն այս կապակցությամբ Factor.am-ի հետ զրույցում առավոտյան նշել է, որ իրենց իրավասությունն է հետևել, որպեսզի ապամոնտաժման աշխատանքները լինեն անվտանգ` թաղամասի բնակիչների համար։ Իսկ բուն ապամոնտաժման աշխատանքները, ըստ նրա, իրականացվելու են ներդրողի կողմից:
Մենք փորձեցինք պարզել, թե որ ընկերությունն է այս պահին հանդիսանում այդ հատվածի ներդրողը, և այդ նպատակով նախ` դիմեցինք Երևանի քաղաքապետարանի լրատվության և հասարակայնության հետ կապերի վարչություն, որտեղից մեզ փոխանցեցին, որ իրենք իրավասու չեն առանց վարչության պետի իմացության` նման հարցի պատասխանել: Իսկ վարչության պետ Արթուր Գևորգյանն էլ, ում հետ ավելի վաղ խոսել էինք, պարզվեց` պատվիրակության հետ մեկնել է Արցախ։ Նրա հետ սակայն, չհաջողվեց վերստին կապ հաստատել. մեր հեռախոսազանգերը մնացին անպատասխան: Դիմեցինք նաև Կառավարությանն առընթեր Քաղաքաշինության պետական կոմիտեի լրատվական վարչություն, որտեղից էլ մեզ ասացին, որ իրենք իրավասու չեն նման տեղեկություն տրամադրել:
«Ներդրումային կառուցապատող ընկերությունների վերաբերյալ Կառավարությունից է պետք ճշտել, մենք նախագծային մասն ենք իրականացնում»,- փոխանցեցին Քաղաքաշինության կոմիտեի լրատվական վարչությունից։
Մենք նաև դիմեցինք Կառավարության լրատվության և հասարակայնության հետ կապերի վարչության պետ Հռիփսիմե Առաքելյանին, ով պարզվեց` այժմ արձակուրդում է և մեզ ուղղորդեց կապ հաստատելլ լրատվության վարչության հետ: Սակայն մեր հեռախոսազանգին պատասխանած օպերատորը փոխանցեց, որ վարչության բոլոր աշխատակիցները նիստի են, ինքն էլ իրավասու չէ հարցին պատասխանել։
Սեդա Ղուկասյան
