Կալանավորը բղավել է և գրպանից հանելով ածելին՝ հարձակվել ծառայողի վրա. նոր մանրամասներ «Արմավիր» ՔԿՀ-ի դեպքից

Factor TV-ն երեկ գրել էր, որ օրեր առաջ արտակարգ դեպք է տեղի ունեցել «Արմավիր» քրեակատարողական հիմնարկում. կալանավորն ածելիով փորձել է կտրել քրեակատարողական ծառայության աշխատակցի պարանոցը։ Փորձը կանխել է ՔԿՀ մեկ այլ աշխատակից, ինչի հետևանքով վնասվել է վերջինիս ձեռքը։

Տեղեկությունն այսօր հաստատեցին նաև Քրեակատարողական ծառայությունից։  Հասարակայնության և լրատվության վարչության պետ Նոնա Նավիկյանը փոխանցեց, որ դեպքը տեղի է ունեցել նոյեմբերի 6-ին՝ ժամը 10:15-ի սահմաններում.

«ՀՀ ԱՆ «Արմավիր» քրեակատարողական հիմնարկի ծառայողները, հերթափոխի հանձնում-ընդունում կատարելու նպատակով, մտել են մասնաշենքի հերթական խուցը, որտեղ միայնակ պահվում էր կալանավորված անձ Ս. Խ.-ն: Հիմնարկի անվտանգության ապահովման բաժնի ծառայողը նկատել է, որ խցում՝ կողապահարանի մեջ, թաքցված է դատապարտյալին տրամադրվող ծածկոցը: Երբ ծառայողը ցանկացել է վերցնել այն, կալանավորված անձը բղավել է, ցուցաբերել ագրեսիվ վարքագիծ, չի ենթարկվել իրականացվող օրինական գործողություններին: Դեռ ավելին՝ Ս. Խ.-ն անսպասելի գրպանից հանել է մեկանգամյա օգտագործման ածելին և հարձակվել ծառայողի վրա: Նրա հարձակումը ծառայողների կողմից կանխվել է ֆիզիկական ուժի կիրառմամբ՝ ձեռքերը ոլորելու միջոցով, որի ընթացքում կալանավորված անձի ձեռքից վերցրել են ածելին: Այս գործողությունների ժամանակ անվտանգության բաժնի ծառայողներից մեկը ձախ նախաբազկի հատվածում ստացել է մարմնական վնասվածք»։

Քրեակատարողական ծառայողին ցուցաբերվել է բուժզննություն, իսկ դեպքի առթիվ նախապատրաստված նյութերն ուղարկվել են ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժին:

Factor TV-ի հետ զրույցում Քննչական կոմիտեից հայտնեցին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 454-րդ հոդվածի 3-րդ մասի 2-րդ կետով (պատիժն ի կատար ածող հիմնարկում կամ ձերբակալվածներին կամ կալանավորվածներին պահելու վայրերում իրականացվող գործունեությունը խոչընդոտելը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ). «Նշանակվել է դատաբժշկական փորձաքննություն։ Նախաքննությունը շարունակվում է»։

Ռոզա Վարդանյան