21.06.2026 | 20:23
Աստղագիտական ամռան առաջին օրը Սևանա լճի մակարդակը հասավ նախորդ տարվա ցուցանիշին․ Հայհիդրոմետ
Թուրքիայի F-16 կործանիչները կմասնակցեն նոյեմբերի 8-ին Բաքվում կայանալիք, այսպես կոչված, «Հաղթանակի օրվա շքերթին»
Քաղաքականություն
06.11.2025 | 18:27
Թուրքիայի ռազմաօդային ուժերի վեց F-16 կործանիչներ կմասնակցեն Բաքվում նոյեմբերի 8-ին կայանալիք զինվորական շքերթին։ Թուրքիայի պաշտպանության նախարարության մամուլի և հասարակայնության հետ կապերի ներկայացուցիչ Զեքի Աքթյուրքը ճեպազրույցում հայտարարել է, որ նոյեմբերի 7-ին տեղի կունենա «Մեհթեր» ստորաբաժանման և Գյանջայի պետական ֆիլհարմոնիկ նվագախմբի համատեղ համերգային ծրագիրը, իսկ նոյեմբերի 8-ին՝ Թուրքիայի նախագահական պահակախմբի արարողակարգային ստորաբաժանման պաշտոնական երթը և F-16-ի թռիչքը։
«Ադրբեջանի «Նոյեմբերի 8-ի հաղթանակի օրվա» տոնակատարություններին կմասնակցեն նաև Նախագահական պահակախմբի գնդի հրամանատարական արարողակարգային ստորաբաժանումը և մեր ռազմաօդային ուժերին պատկանող վեց F-16 ինքնաթիռներ»,- ասել է նա։
Ադրբեջանական աղբյուրները հայտնում են, որ Պակիստանի բանակի ստորաբաժանումները նույնպես մասնակցելու են շքերթին։
Ավելի վաղ հաղորդվել էր, որ Թուրքիայի պաշտպանության նախարար Յաշար Գյուլերը Բաքու կմեկնի թուրքական պատվիրակության կազմում՝ շքերթը դիտելու համար։ Թուրքիայի ԱԳ նախարար Հաքան Ֆիդանը ևս լինելու է պատվիրակության կազմում։ Բացի այդ, այսպես կոչված, «Հաղթանակի օրվա» շքերթին ներկա է լինելու նաև Սերբիայի զինված ուժերի գլխավոր շտաբի պետ, գեներալ Միլան Մոյսիլովիչը։
Թուրքիայի նախագահ Ռեջեփ Թայիփ Էրդողանն ու Պակիստանի վարչապետ Շահբազ Շարիֆը նույնպես նոյեմբերի 8-ին Բաքվում ներկա կգտնվեն շքերթին։
Թարգմանությունը՝ Էմմա Չոբանյանի
