Քաղաքականություն
04.11.2025 | 18:41
Ուկրանիայի Գլխավոր հետախուզական վարչությունը հայտնել է, որ շարունակում է Պոկրովսկում իր հատուկ գործողությունը և լրացուցիչ հատուկ նշանակության ուժերի հետ համատեղ խոչընդոտում է օկուպանտներին՝ իրենց կրակային ուժը տարածել պատասխանատվության գոտում գտնվող լոգիստիկայի վրա, փոխանցում է Պրավդան։
«Ուկրաինայի պաշտպանության նախարարության հետախուզության վարչության «Տիմուրի հատուկ նշանակության» ուժերը շարունակում են իրենց գործողությունը Դոնեցկի մարզի Պոկրովսկի շրջանում, որը կարևոր նշանակություն ունի առաջնագծի լոգիստիկայի համար: Շարունակվում են կատաղի մարտեր ռուս օկուպանտների հետ»,- ասվում է հայտարարության մեջ։
Հաղորդվում է, որ հաջող դեսանտային գործողությունից հետո որոշակի դիրքեր զբաղեցրած հատուկ նշանակության ուժերը բացել են ցամաքային միջանցք և նրանց միացել են լրացուցիչ հատուկ նշանակության ուժեր։
«Մարտական գործողությունները շարունակվում են՝ ուղղված թշնամու կողմից կրակային ուժը Գլխավոր հետախուզական վարչության պատասխանատվության գոտում լոգիստիկայի վրա տարածելու փորձերի կանխմանը»,- ասվում է հայտարարության մեջ։
Ուկրաինայի պաշտպանության նախարարության Գլխավոր հետախուզական վարչության այլ հատուկ նշանակության ստորաբաժանումներ նույնպես մարտական առաջադրանքներ են իրականացնում այդ հատվածում։ Մասնակցող ստորաբաժանումների անձնակազմի անվտանգության համար գործողությունների մանրամասները դեռևս չեն հրապարակվում։
Ուկրաինական OSINT DeepState նախագծի վերջին զեկույցի համաձայն՝ ռուսական զորքերն առաջ են շարժվել դեպի Դոնեցկի մարզի Պոկրովսկ քաղաքում: Նախագծի թարմացված քարտեզը Պոկրովսկի մոտակայքում ցույց է տալիս նրանց առաջխաղացման մեկ այլ ուղղություն։
Պոկրովսկի մոտակայքում իրավիճակը շարունակում է լարված մնալ Ուկրաինայի զինված ուժերի համար: Ընդամենը մեկ շաբաթ առաջ Ռուսաստանի նախագահ Վլադիմիր Պուտինը հայտարարել էր, որ քաղաքը լիովին շրջափակված է: Ուկրաինական զորքերը հերքել էին դա, բայց ընդունել, որ իրավիճակը գրեթե կրիտիկական է: Անցյալ շաբաթավերջին հաղորդվել էր, որ քաղաքի մոտակայքում հատուկ նշանակության ջոկատների դեսանտ է իջեցվել պաշտպանվող ուկրաինական ուժերի մատակարարման ուղիները պաշտպանելու համար:
DeepState-ն արդեն մի քանի օր է՝ հաղորդում է Պոկրովսկի տարածքում ռուսական բանակի առաջխաղացման մասին, սակայն նախագծի մարտական քարտեզի համաձայն՝ քաղաքը դեռևս ամբողջությամբ շրջապատված չէ։
Ավելի վաղ էլ Ուկրաինայի զինված ուժերի գլխավոր հրամանատար Ալեքսանդր Սիրսկին այցելել էր Պոկրովսկի և Միրնոգրադի շրջաններ և ընդունել տարածքում ստեղծված դժվարին իրավիճակը։
Թարգմանությունը՝ Էմմա Չոբանյանի
