01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Ես անձամբ և Գերմանիայի կառավարությունը Թուրքիային համարում ենք Եվրամիության մտերիմ գործընկեր. Մերցը` Էրդողանին
Քաղաքականություն
30.10.2025 | 21:04
Եթե ԵՄ-ն ունի իր Կոպենհագենի չափանիշները, ապա Թուրքիան ունի իր սեփական՝ Անկարայի չափանիշները դաշինքին անդամակցելու համար։ Անկարայում Գերմանիայի կանցլեր Ֆրիդրիխ Մերցի հետ հանդիպման ժամանակ այս մասին հայտարարել է Թուրքիայի նախագահ Ռեջեփ Թայիփ Էրդողանը։
«Մենք կբացվենք Եվրոպայի և աշխարհի առջև «Անկարայի չափանիշներով»։ Թուրքիան կարող է արագ առաջընթաց գրանցել ԵՄ լիիրավ անդամակցության ուղղությամբ, եթե դաշինքը ճանաչի երկրի ցուցաբերած վճռականությունը»,- Անկարայում համատեղ մամուլի ասուլիսում ասել է Էրդողանը։
Մերցն իր հերթին նշել է՝ ուզում են Թուրքիային տեսնել ԵՄ-ում, սակայն «Թուրքիան դեռևս չի բավարարել ԵՄ-ին անդամակցելու չափանիշները»։
«Ես անձամբ, նաև Գերմանիայի կառավարությունը Թուրքիային համարում ենք Եվրամիության մտերիմ գործընկեր։ Մենք ցանկանում ենք շարունակել հարթել ճանապարհը դեպի Եվրոպա»,- ասել է Մերցը։
Երկու առաջնորդները նաև անդրադարձել են երկկողմ պաշտպանական կապերին։
Թուրքիան, որը ՆԱՏՕ-ի անդամ է, տեխնիկապես իրավասու է մուտք գործել ԵՄ պաշտպանական արդյունաբերության ֆինանսավորման և համատեղ գնումների ծրագրեր՝ որպես դաշինքի 150 միլիարդ եվրոյի «Եվրոպայի համար անվտանգության գործողություն» (SAFE) նախաձեռնության մաս։ Սակայն Հունաստանը և Կիպրոսը դեմ են։ Թուրքիայի անդամակցության համար անհրաժեշտ է ԵՄ բոլոր անդամների հաստատումը։
Մյուս կողմից, Էրդողանը քննադատել է Գերմանիայի դիրքորոշումը Իսրայելի նկատմամբ՝ չնայած Գազայի խաղաղ բնակիչների վրա հարձակումներին։
«Մի՞թե Գերմանիան չի տեսնում Իսրայելի կողմից Գազայի վրա նոր հարձակումները։ Մի՞թե նա չի տեսնում, որ Իսրայելը սով և ցեղասպանություն է պարտադրում Գազային»,- հայտարարել է նա։
Թարգմանությունը՝ Էմմա Չոբանյանի
