07.09.2026 | 14:49
Իսրայելի կողմից Լիբանանի հարավին հասցված հարվածների հետևանքով առնվազն 11 մարդ է զոհվել
Դատարանը ՀՊՄՀ ռեկտորի նկատմամբ կիրառել է տնային կալանք և 20 մլն դրամ գրավ
Քաղաքականություն
18.10.2025 | 19:43
Դատարանը Խաչատուր Աբովյանի անվան հայկական պետական մանկավարժական համալսարանի (ՀՊՄՀ) ռեկտոր Սրբուհի Գևորգյանի նկատմամբ որպես խափանման միջոց կիրառել է տնային կալանք և 20 միլիոն դրամ գրավ։ «Արմենպրես»-ի հետ զրույցում այս մասին տեղեկացրին Հակակոռուպցիոն կոմիտեից։
Ավելի վաղ, Հակակոռուպցիոն կոմիտեն հայտնել էր, որ կոմիտեի կողմից իրականացվող քրեական վարույթի շրջանակում ձերբակալվել են Սրբուհի Գևորգյանը, համալսարանի մի պրոռեկտոր և մի խումբ այլ աշխատակիցներ։
Ըստ հաղորդագրության՝ վերջիններս մեղադրվում են համալսարանի տարբեր աշխատակիցներից կազմված հանցավոր կազմակերպություն ստեղծելու և ղեկավարելու, առանձնապես խոշոր չափերով վատնում, խարդախություն և կաշառք ստանալու մեջ։
ՀՊՄՀ ռեկտորի պաշտպան Կարեն Գաբրիելյանը հայտնել է, որ դատարանը մերժել է Սրբուհի Գևորգյանին կալանավորելու քննիչի միջնորդությունը և որոշել է նրա նկատմամբ կիրառել այլընտրանքային խափանման միջոց։
Պաշտպանը նաև նշել է, որ ՀՊՄՀ ռեկտորը չի ընդունում իրեն առաջադրված մեղադրանքը։
Սրբուհի Գևորգյանը Մանկավարժական համալսարանի ռեկտորի պաշտոնը զբաղեցնում է 2022 թվականի մարտի 19-ից։
