18.05.2026 | 12:46
Նիկոլ Փաշինյանի ճեպազրույցը․ ՈՒՂԻՂ
Քանի՞ միլիարդ դրամ է պետք գազի և հոսանքի սակագինը 5 դրամով նվազեցնելու համար
Տնտեսություն
26.10.2018 | 12:51
Ազգային ժողովի գազի և էլեկտրաէներգիայի մատակարարման և բաշխման համակարգերի գործունեությունը, գազի և էլեկտրաէներգիայի գործող սակագների հիմնավորվածությունը ուսումնասիրելու նպատակով ստեղծված քննիչ հանձնաժողովի այսօրվա նիստում հանձնաժողովի նախագահ ԱԺ փոխնախագահ Միքայել Մելքումյանն անդրադարձավ գազի և էլեկտրաէներգիայի սակագների նվազմանն ու այդ համակարգերում կորուստների չափերին։
Մելքումյանը նշեց, որ կատարված ուսումնասիրություններից հետո իր համար անհասկանալի է մնում, որ գազի փոխադրումների և բաշխման ժամանակ կորուստները ոչ թե ցածր են, ինչպես ամբողջ աշխարհում է, այլ հակառակը՝ բարձր են։
«Մենք պետք է հասկանանք, թե գազատարի հետ կապված ի՞նչ է կատարվում։ Պետական շահերից ելնելով՝ մեկ-երկու փակ նիստ այս հարցի վերաբերյալ կունենանք»,- ասաց հանձնաժողովի նախագահը։
Վերջինս նաև նշեց, որ առաջիկայում կսկսվեն գազի սահմանային գնի և դրանից բխող սակագնի հարցի նվազեցման հարցն ուսումնասիրել, ուստի առաջիկայում կսկսվեն ծանր բանակցություններ, իսկ դրանց արդյունքում արդեն իսկ ստորագրված պայմանագրերում անհրաժեշտ է լինելու կատարել որոշակի փոփոխություններ։
«17 մլրդ դրամ է պետք՝ հինգ դրամով գազի սակագինը նվազեցնելու համար»,- ասաց Մելքումյանը։
ԱԺ փոխնախագահը նաև անդրադարձավ ՀԷՑ-ի կորուստների խնդրին և ասաց, որ կորուստները կազմում են 11,02 տոկոս, և երբ հաջորդ շաբաթ կներկայացվի ՀԷՑ-ի ներդումային փաթեթը, այդտեղ արդեն արտացոլված կլինի նոր պատկեր, թե հաջորդ տարիներին այդ կորուստները քանի տոկոսով են նվազելու։
Խոսելով հոսանքի սակագնի հնարավոր նվազման մասին՝ Մելքումյանն ասաց․ «Հինգ դրամով, որպեսզի հոսանքի սակագինը իջնի, մեզ անհրաժեշտ է 27 մլրդ դրամ»։
