Ռուսաստանը պատրաստվում է աջակցել ներքին շուկային՝ բենզինի դեֆիցիտի ֆոնին

Մի քանի շրջաններում արտադրության նվազման և բենզինի պակասի պայմաններում Ռուսաստանի իշխանությունները պատրաստում են մի շարք միջոցառումներ՝ ներքին վառելիքի շուկային աջակցելու համար: Այս մասին է վկայում ՌԴ փոխվարչապետ Ալեքսանդր Նովակի՝ սեպտեմբերի 24-ին վարչապետ Միխայիլ Միշուստինին ուղղված ուղերձը, որի հատվածները հրապարակել է «Կոմերսանտ»-ը, գրում է DW-ն։

Առաջարկվում է չեղարկել 5% մաքսային տուրքերը Չինաստանից, Հարավային Կորեայից և Սինգապուրից Ռուսաստանի Հեռավոր Արևելքի մի քանի անցակետերով ներմուծվող բենզինի համար: Վառելիք մատակարարել թույլատրվելու է միայն որոշակի ընկերությունների՝ «Ռոսնեֆտ»-ին, «ՆՆԿ» ԲԲԸ-ին և «Պրոմսիրիեմպորտ»-ին։

Իշխանությունները նախատեսում են թույլատրել մոնոմեթիլանիլինի օգտագործումը բենզինի արտադրության մեջ վեց ամսվա ընթացքում: Սա հնարավորություն կտա ավելացնել բարձր օկտանային 5-րդ դասի բենզինի արտադրությունը՝ հավելանյութը ավելացնելով ցածր օկտանային վառելիքին: Մոնոմեթիլանիլինն արգելված է երկրների մեծ մասում՝ իր բարձր թունավորության և քաղցկեղի առաջացման ռիսկի պատճառով, բայց Ռուսաստանում օգտագործվել է մինչև 2016 թվականը:

Եթե ​​այս միջոցառումներն իրականացվեն, հնարավոր կլինի ամսական ներքին շուկա լրացուցիչ մատակարարել առնվազն 350,000 տոննա բենզին և 100,000 տոննա դիզելային վառելիք։

Ռուսաստանի իշխանությունները նաև առաջարկում են ավելացնել Բելառուսից բենզինի ներմուծումը։

Ուկրաինայի կողմից ռուսական նավթավերամշակման գործարանների վրա հարձակումների աճի ֆոնին`Անկախ վառելիքի միությունը սեպտեմբերի կեսերի դրությամբ բենզինի պակաս է գրանցել Ռուսաստանի Դաշնության 21 մարզերում՝ Չուկոտկայից և Սախալինից մինչև Ռյազանի և Սամարայի մարզեր։

«Այս ֆոնին շատ տարածաշրջաններում սահմանափակումներ են սահմանել մեկ հաճախորդի համար բենզինի վաճառքի վրա՝ ոչ ավելի, քան 10-20 լիտր: Ճգնաժամը սրվում է բենզինի բորսային գների ռեկորդային աճով. դրանք տարվա սկզբից ի վեր աճել են 40-50%-ով»,- նշում է The Moscow Times-ը:

Թարգմանությունը՝ Էմմա Չոբանյանի