16.02.2026 | 22:10
Ով է իրականացրել փոսային նորոգումը․ քրգործի ու 2 մլն 836 հազար դոլարի հետքերով. ՏԵՍԱՆՅՈՒԹ
Պեսկովն «անպատասխանատու» է անվանել ՆԱՏՕ-ի երկրների կողմից ռուսական ինքնաթիռները խոցելու պատրաստակամության մասին հայտարարությունները
Քաղաքականություն
26.09.2025 | 20:36
Եվրոպական երկրների ներկայացուցիչների հայտարարությունները ՆԱՏՕ-ի կողմից ռուսական ինքնաթիռները խոցելու պատրաստակամության մասին, եթե դրանք ներխուժեն դաշինքի անդամների օդային տարածք, անպատասխանատու են։ Ռուսաստանի կողմից նման խախտումների վերաբերյալ որևէ ապացույց չի ներկայացվել։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Ես նույնիսկ չեմ ուզում խոսել այդ մասին, քանի որ դա շատ անպատասխանատու հայտարարություն է»,- լրագրողներին ասել է նա՝ մեկնաբանելով լրատվամիջոցներում հայտնված տեղեկատվությունը։
Ըստ Կրեմլի խոսնակի՝ «Ռուսաստանին ուղղված մեղադրանքները, թե ռուսական ինքնաթիռները խախտել են ուրիշի օդային տարածքը և ներխուժել ուրիշի երկինք, անհիմն են, որևէ համոզիչ ապացույց չի ներկայացվել»։
«Մենք պնդում ենք, որ մեր բոլոր ռազմական ինքնաթիռները թռիչքներ են իրականացնում միջազգային կանոնակարգերի խիստ պահպանմամբ»,- ընդգծել է Պեսկովը։
Ավելի վաղ ՆԱՏՕ-ի գլխավոր քարտուղար Մարկ Ռյուտեն սատարել էր ԱՄՆ նախագահ Դոնալդ Թրամփի առաջարկը՝ խոցել ռուսական ռազմական ինքնաթիռները դաշինքի օդային տարածքում, սակայն պարզաբանել էր, որ նման գործողությունները թույլատրելի են միայն իսկապես անհրաժեշտության դեպքում։
Սեպտեմբերի 23-ին Թրամփը հանդես էր եկել այն բանի օգտին, որ ՆԱՏՕ-ի երկրները խոցեն ռուսական ռազմական ինքնաթիռները, եթե դրանք թռչում են դաշինքի օդային տարածքում։ Լրագրողի հարցին՝ արդյո՞ք ԱՄՆ-ն պատրաստ է օգնել իր դաշնակիցներին նման իրավիճակներում, նախագահը պատասխանել էր. «Կախված է իրավիճակից»։
Bloomberg-ը, հղում անելով աղբյուրներին, հաղորդել էր, որ Մեծ Բրիտանիայի, Ֆրանսիայի և Գերմանիայի դեսպանները Մոսկվայում կայացած հանդիպման ժամանակ մտահոգություն են հայտնել ռուսական երեք կործանիչների՝ Էստոնիայի օդային տարածք ներխուժման վերաբերյալ և զգուշացրել են ՆԱՏՕ-ի օդային տարածքը խախտող ինքնաթիռները խոցելու պատրաստակամության մասին:
Աղբյուրների խոսքով՝ բանակցությունների ընթացքում ռուս պաշտոնյաներից մեկը նշել է, որ օդային տարածքի խախտումը պատասխան է եղել Ուկրաինայի կողմից բռնակցված Ղրիմի վրա հարձակմանը: Կրեմլը հայտարարել է, որ նման գործողություններն անհնար կլինեին առանց ՆԱՏՕ-ի աջակցության, այդ իսկ պատճառով Ռուսաստանը կարծում է, որ արդեն իսկ գտնվում է եվրոպական երկրների հետ առճակատման վիճակում։
Թարգմանությունը՝ Էմմա Չոբանյանի
