10.10.2026 | 13:36
Հայտնաբերվել է զինծառայողի դի՝ հրազենային վնասվածքով․ ՊՆ
Հայկ Սարգսյանի գործով տուժող Դավիթ Սիմոնյանին բերման կենթարկեն
Հասարակություն
23.10.2018 | 17:22
Ինչպես արդեն տեղեկացրել էինք, Երևանի ընդհանուր իրավասության դատարանի Շենգավիթի նստավայրում ընթանում է Սերժ Սարգսյանի եղբորորդու՝ Հայկ Սարգսյանի գործով դատական նիստը:
Դատարանը մերժեց պաշտպանի միջնորդությունը, որով նա բացարկ էր հայտնել մեղադրող դատախազին: Նիստին այդպես էլ չներկայացան տուժողն ու նրա ներկայացուցիչը:
Սպանության փորձի մեջ մեղադրվող Հայկ Սարգսյանն իրեն առաջադրված մեղադրանքները չի ընդունում: Դատավորը Հայկին ներկայացրեց նրա իրավունքներն ու պարտականությունները, որից հետո կրկին պաշտպան Երեմ Սարգսյանը միջնորդություն ներկայացրեց: Նա ասաց, որ իրենք դիմել են քննիչին ու դատախազին, որպեսզի տուժողի հագուստները համարվեն իրեղեն ապացույց և բերվեն դատարան. «Միջնորդում եմ, որպեսզի վարույթն իրականացնող մարմնից պահանջեք Դավիթ Սիմոնյանի հագուստները, որոնք տրվել են փորձաքննության և հայտարարվել է, որ դրանց վրա հայտնաբերվել են հանցագործության հետքեր, ապա պետք է այդ հագուսtը ճանաչվի իրեղեն ապացույց, ինչպես որ ճանաչվել է զենքը, որով նշվում է, թե կրակոց է արձակվել»:
Մեղադրող դատախազն ասաց, որ հագուստները պահպանված չեն, քանի որ քրեական գործի որոշ նյութեր ոչնչացված են եղել և դրանց մեջ է նաև հագուստները: Դատարանը պահանջեց փաստաթղթեր ներկայացնել, որոնք կապացուցեն, որ այդ նյութերը ոչնչացվել են:
Անհրաժեշտ տվյալները ներկայացնելու համար դատախազին մեկ շաբաթ ժամանակ տրվեց: Դատական նիստը հետաձգվեց:
Ի դեպ, նիստի ավարտին դատարանը որոշեց բերման ենթարկել տուժող Դավիթ Սիմոնյանին, քանի որ նրա բացակայությունը այսօրվա նիստին չուներ հարգելի պատճառ:
