14.10.2026 | 14:35
«Մաթեմատիկա» առարկայի միասնական քննության օրը տեղափոխվում է
Երեխաներիդ կերակրելու համար չպետք է թոռներիդ սպանես. Սերժ Թանկյանն աջակցություն է հայտնել Ամուլսարի շահագործման դեմ պայքարողներին
Հասարակություն
23.10.2018 | 12:04
Երեխաներիդ կերակրելու համար չպետք է թոռներիդ սպանես: Այս մասին ֆեյսբուքյան ուղերձով ասել է աշխարհահռչակ ռոք երաժիշտ Սերժ Թանկյանը՝ աջակցություն հայտնելով Ամուլսարի հանքի շահագործման դեմ քաղաքացիական բողոքի ակցիաներին: Տեսանյութը հրապարակել է Հայկական բնապահպանական ճակատը:
«Մենք գիտենք, որ հանքերը հարատև վնաս են հասցնում բնական միջավայրին՝ անկախ նրանից, թե ինչ տիպի հանք է, որքան լավ է վերահսկվում հանքի գործունեությունը աղտոտիչների առումով: Այն, ամեն դեպքում, հարատև վնաս է հասցնելու բնական միջավայրին: Մանավանդ բաց հանքերը, ինչպես առաջարկվել է Ամուլսարի դեպքում, որտեղ օգտագործվելու են պայթուցիկներ և այլն: Ոչ մի երաշխիք չկա, որ աղտոտիչները չեն թափանցի ջրային ավազաններ: Հանքերի ստեղծած վտանգը հարատև է, իսկ դրանց հակադրվող օգուտը, այն է՝ աշխատատեղերի ստեղծումը՝ ժամանակավոր, ինչը պատճառ է դարձել, որ մի շարք արդյունաբերական երկրներում հրաժարվեն հանքարդյունաբերությունից կամ էլ էականորեն կրճատեն շահագործվող հանքերի քանակը: Բնիկ ամերիկացիներն ասում էին՝ երեխաներիդ կերակրելու համար չպետք է թոռներիդ սպանես: Այսինքն՝ կարճատև օգուտի համար չի կարելի վնասել բնությունդ, երկիրդ, ժողովրդիդ: Սա է պատճառը, որ ես դեմ եմ հանքարդյունաբերությանն ընդհանրապես և Ջերմուկի մոտ «Լիդիան» ընկերության կողմից Ամուլսարի հանքի շահագործմանը՝ մասնավորապես»,- նշել է Թանկյանը:
