Տնտեսություն
10.09.2025 | 12:34
ՀԷՑ-ը Սարյան փողոցի նկարազարդ աստիճաններին կից մայթի տարածքում 6 կՎ հզորության երկու մալուխագծերի մոնտաժման աշխատանքներ է իրականացնում։ Տեղեկությունը Factor.am-ի հարցմանն ի պատասխան տեղեկացնում են ընկերության մամուլի ծառայությունից։
«Տարածքում մալուխագծերի մոնտաժման աշխատանքները կավարտվեն սեպտեմբերի 22-ին»,- հայտնում են ՀԷՑ-ից։
Factor.am-ը արձանագրել էր, որ նորից քանդել են Երևանի Սարյան փողոցի նկարազարդ աստիճաններին կից մայթը։ Քաղաքապետարանից փոխանցել են, որ «Սարյանի աստիճաններ» նախագծի ավարտական փուլն է ընթանում և տարածքում իրականացվում են ջրահեռացման համակարգի նորոգման աշխատանքներ։ Կառույցից հայտնել էին, որ ՀԷՑ-ը ևս աշխատանքեր է իրականացնում։
Factor.am-ը դիմել էր ՀԷՑ՝ պարզելու, թե ինչ աշխատանքներ են տարածքում իրականացվում։ Ընկերությունից բանավոր պատասխան չէին տվել, այլ հորդորել հարցում ուղարկել։
Նշենք, որ ընդամենը 6 ամիս առաջ մայթը սահմանազատված էր և լայնացման աշխատանքներ էին իրականացվում։ Այն ժամանակ Կենտրոնի թաղապետարանից տեղեկացրել էին՝ մայթի լայնացման նպատակն այն է, որ մեքենաներ չկայանեն, և Սարյանի «Հայաստան» կտավը՝ կավից պատրաստված խճանկարով, անգամ հեռվից տեսանելի լինի։ Կենտրոնի թաղապետ Պետրոս Պետոյանն ասել էր, որ այն «Սարյանի աստիճաններ» նախագծի երկրորդ փուլն է։
Մարտիրոս Սարյանի անունը կրող փողոցի գլխավոր աստիճանների և հարակից տարածքի բարեկարգման ծրագիրը իրականացնում են Կենտրոն վարչական շրջանն ու «Կերոն» զարգացման հիմնադրամը։
Անի Թամրազյան
