04.08.2026 | 13:06
Ճապոնիայի վարչապետը շնորհավորել է Նիկոլ Փաշինյանին ՀՀ վարչապետի պաշտոնում վերանշանակվելու առիթով
Իսրայելը հարվածել է Սիրիայում Թուրքիայի մատակատարարած հրթիռների, ՀՕՊ սարքերի պահեստներին
09.09.2025 | 22:53
Սաուդյան Al-Hadath հեռուստաընկերությանը հայտնել է, որ երկուշաբթի գիշերը սիրիական Հոմս քաղաքի ուղղությամբ հարվածի թիրախ են դարձել թուրքական արտադրության հրթիռների և հակաօդային պաշտպանության սարքավորումների պահման պահեստները, գրում է Turkish Minute-ը։
Աղբյուրը մեղադրել է Թուրքիային Իսրայելին «սադրելու» մեջ և ասել, որ Իսրայելը Սիրիայի նոր ղեկավարության հետ բանակցություններ է վարում անվտանգության ապահովման շուրջ՝ պահպանելով ուժ կիրառելու իրավունքը։
Սիրիայի պետական լրատվամիջոցները և տարածաշրջանային լրատվամիջոցները հայտնել են, որ հարված է հասցվել նաև Լաթաքիայի շրջակայքում գտնվող ռազմական օբյեկտներին։
Տեսանյութերում երևում են պայթյուններ և ծուխ Հոմսի և Լաթաքիայի շրջաններում։ Դամասկոսը դատապարտել է հարվածը՝ այն որակելով որպես Սիրիայի ինքնիշխանության խախտում։
Իսրայելը տարիներ շարունակ հարյուրավոր հարվածներ է հասցրել Սիրիայում՝ կանխելու համար վերջինիս ռազմական ուժերի կողմից առաջադեմ զենքի կուտակումը, որը կարող է սպառնալ Իսրայելի հյուսիսին։
Այդ թիրախները պատմականորեն ներառում էին Իրանի հետ կապված օբյեկտներ և սիրիական ավիաբազաներ, սակայն Բաշար ալ-Ասադի իշխանության տապալումից հետո՝ 2024 թվականի դեկտեմբերին, Իսրայելը ընդլայնել է իր արշավը պատերազմից հետո իրականացվող ցանկացած ռազմական կուտակման դեմ, որը նա համարում է վտանգավոր։
Անկարան և Թել Ավիվը փորձում են խուսափել ուղիղ բախումներից՝ չնայած Իսրայելի կողմից Ղազայում և Սիրիայում իրականացվող ռազմական գործողությունների շուրջ կոշտացող հռետորաբանությանը։
Երկու կողմերն այս տարի տեխնիկական բանակցություններ են սկսել՝ Սիրիային կենտրոնացած հակամարտությունների կարգավորման ալիք ստեղծելու համար՝ իրենց ուժերի միջև միջադեպերը կանխելու համար։
Ադրբեջանը, որը սերտ կապեր ունի և՛ Թուրքիայի, և՛ Իսրայելի հետ, որպես միջնորդ հյուրընկալել է բանակցություններ։ Չնայած դրան՝ Իսրայելը շարունակում է հարվածներ հասցնել։
Թարգմանությունը՝ Էմմա Չոբանյանի
