ԱՄՆ-ն խստացնում է ոչ ներգաղթային վիզաների տրամադրման ընթացակարգը

ԱՄՆ կառավարությունը խստացրել է օտարերկրացիներին ոչ ներգաղթային վիզաներ տրամադրելու կանոնները, այդ թվում՝ B1/B2 տուրիստական ​​վիզաների: Համաձայն Պետդեպարտամենտի կողմից  սեպտեմբերի 6-ին  հրապարակված հրամանագրի՝ այժմ հնարավոր կլինի դրանց համար դիմել միայն քաղաքացիության կամ մշտական ​​բնակության երկրում, գրում է DW-ի ռուսական ծառայությունը։

Միաժամանակ, 17 երկրների քաղաքացիների համար, որտեղ նման վիզաների տրամադրումը դադարեցվել է, նշանակվել են որոշակի դեսպանատներ և հյուպատոսություններ, որտեղ նրանք կարող են դիմումներ ներկայացնել։

Այսպիսով, ռուսները կկարողանան դա անել միայն Աստանայում և Վարշավայում գտնվող ԱՄՆ դեսպանատներում, Բելառուսի քաղաքացիները՝ Վարշավայում կամ Վիլնյուսում, իսկ ուկրաինացիները՝ Վարշավայում և Կրակովում։

Մինչ օրս հնարավոր էր հարցազրույց անցնել և այդ տեսակի վիզայի համար դիմել ցանկացած երկրում։ Արդեն նշանակված հարցազրույցների համար նախատեսված հանդիպումները մնում են ուժի մեջ։

Նշվում է, որ նոր կանոնները չեն տարածվում A, G, C-2, C-3, ՆԱՏՕ-ի վիզաների, դիվանագիտական ​​և ծառայողական ցանկացած տեսակի վիզաների կամ ՄԱԿ-ի գլխավոր գրասենյակի մասին համաձայնագրի շրջանակներում ճանապարհորդության հետ կապված վիզաների վրա: Պետդեպարտամենտի հայտարարության մեջ նշվում է, որ բացառություններ կարող են արվել հազվագյուտ դեպքերում՝ մարդասիրական, բժշկական կամ արտաքին քաղաքականության նկատառումներից ելնելով:

Թարգմանությունը՝ Էմմա Չոբանյանի