07.09.2026 | 13:33
Պուտինը զանգահարել է Ալիևին․ քննարկվել են առևտրատնտեսական ու հումանիտար հարցեր
Սուդանում սողանքի հետևանքով առնվազն 1000 մարդ է զոհվել․ ՏԵՍԱՆՅՈՒԹ
Քաղաքականություն
02.09.2025 | 22:55
Սուդանի արևմտյան Մարրա լեռներում սողանքի հետևանքով զոհվել է առնվազն 1000 մարդ: Այս մասին հայտնել է «Սուդանի ազատագրական շարժում/բանակ» զինված խումբը, գրում է BBC-ն։
Նշվում է, որ կիրակի օրը տեղացած հորդառատ անձրևները սողանքի պատճառ են դարձել, ինչի հետևանքով Տարասին գյուղի մեծ մասն ավերվել է։
Շարժումը մարդասիրական օգնություն է խնդրել ՄԱԿ-ից և այլ տարածաշրջանային ու միջազգային կազմակերպություններից։
Սուդանի բանակի և արագ աջակցության ուժերի (RSF) միջև պատերազմից հետո Հյուսիսային Դարֆուր նահանգի շատ բնակիչներ ապաստան էին գտել Մարրա լեռների շրջանում։
Դարֆուրի նահանգապետ Մինի Մինավին, որն աջակցում է բանակին, սողանքն անվանել է «մարդասիրական ողբերգություն»։
«Մենք կոչ ենք անում միջազգային մարդասիրական կազմակերպություններին շտապ միջամտել և աջակցություն ու օգնություն ցուցաբերել այս կարևոր պահին, քանի որ ողբերգությունն ավելի մեծ է, քան մեր ժողովուրդը կարող է միայնակ հաղթահարել»,- ասել է նա։
2023 թվականի ապրիլին Սուդանի բանակի և RSF-ի միջև բռնկված քաղաքացիական պատերազմը երկիրը ներքաշել է սովի մեջ և հանգեցրել Դարֆուրի արևմտյան շրջանում ցեղասպանության մեղադրանքների։ Քաղաքացիական պատերազմի զոհերի թվի գնահատականները զգալիորեն տարբերվում են, սակայն անցյալ տարի ԱՄՆ պաշտոնյաներից մեկը գնահատել է, որ 2023 թվականին ռազմական գործողությունների սկսվելուց ի վեր զոհվել է մինչև 150,000 մարդ։ Շուրջ 12 միլիոն մարդ լքել է տները։
Թարգմանությունը՝ Էմմա Չոբանյանի
