ՇՀԿ գագաթնաժողովը հռչակագիր է ընդունել՝ առանց Ուկրաինայի հիշատակման․ Կիևն արձագանքել է

Շանհայի համագործակցության կազմակերպության (ՇՀԿ) պետությունների ղեկավարների՝ չինական Տյանցզին քաղաքում սեպտեմբերի 1-ին կայացած գագաթնաժողովից հետո ընդունված հռչակագրում պետությունները հայտարարել են համագործակցությունն ամրապնդելու մտադրության, այդ թվում՝ ռազմական, էներգետիկ և տրանսպորտային ոլորտներում, ինչպես նաև արհեստական ​​բանականության համակարգերի անվտանգության ոլորտում համատեղ աշխատելու մասին, գրում է DW-ի ռուսական ծառայությունը։

Նրանք նաև կոչ են արել ՄԱԿ-ը հարմարեցնել «ժամանակակից քաղաքական և տնտեսական իրողություններին՝ իրականացնելով լավ մտածված բարեփոխում՝ ՄԱԿ-ի կառավարման մարմիններում զարգացող երկրների ներկայացվածությունն ապահովելու համար»։

Փաստաթղթում նաև արտահայտվում է ՇՀԿ երկրների «խորը մտահոգությունը» պաղեստինա-իսրայելական հակամարտության շարունակական սրման վերաբերյալ, «խիստ դատապարտվում» են այն գործողությունները, որոնք «հանգեցրել են բազմաթիվ քաղաքացիական զոհերի և աղետալի մարդասիրական իրավիճակի Գազայի հատվածում»։

Հռչակագրի տեքստում դատապարտվում են Իսրայելի և ԱՄՆ-ի կողմից Իրանի տարածքին հասցված հարվածները, որոնք ուղղված են Իրանի միջուկային ծրագիրը չեզոքացնելուն։

Փաստաթղթում նշվում է, որ «պետությունների ինքնիշխանության, անկախության, տարածքային ամբողջականության, հավասարության, փոխադարձ շահի, ներքին գործերին չմիջամտելու, ուժի կամ դրա սպառնալիքի չկիրառման սկզբունքները միջազգային հարաբերությունների կայուն զարգացման հիմքն են»։

Հռչակագրում, սակայն, Ուկրաինայի պատերազմի մասին ոչինչ չի հիշատակվում։

Ուկրաինայի արտաքին գործերի նախարարությունը ՇՀԿ հռչակագրում պատերազմի մասին հիշատակման բացակայությունն անվանել է «պերճախոս»։

«Զարմանալի է, որ Երկրորդ համաշխարհային պատերազմից ի վեր Եվրոպայում ամենամեծ նվաճողական պատերազմը չի արտացոլվել այդքան կարևոր, հիմնարար փաստաթղթում, մինչդեռ այնտեղ հիշատակվում են աշխարհում տեղի ունեցած մի շարք այլ պատերազմներ, ահաբեկչական հարձակումներ և իրադարձություններ»,- ասվում է Ուկրաինայի ԱԳՆ-ի հայտարարությունում։

Կիևը կարծում է, որ սա վկայում է Մոսկվայի դիվանագիտական ​​ջանքերի ձախողման մասին։

«Ակնհայտ է, որ Մոսկվան չկարողացավ այս հարցում մասնակից պետությունների ազգային դիրքորոշումները հասցնել  Ռուսաստանի Դաշնությանը համապատասխանող ընդհանուր հայտարարի։ Հաշվի առնելով Չինաստանի ծանրակշիռ աշխարհաքաղաքական դերը՝ մենք կողջունենք Պեկինի ավելի ակտիվ դերը Ուկրաինայում խաղաղություն հաստատելու գործում՝ ՄԱԿ-ի կանոնադրության հարգանքի հիման վրա»,- ասվում է հայտարարության մեջ։

Թարգմանությունը՝ Էմմա Չոբանյանի