20.08.2026 | 20:37
Կարեն Սարուխանյանը և Անանիկ Ոսկանյանը «օդից փող» են հայտարարագրել․ Մեսրոպ Մանուկյան. ՏԵՍԱՆՅՈՒԹ
«Gangnam Style» հիթով հայտնի ռեփեր PSY-ն ձերբակալվել է Սեուլում
Հասարակություն
30.08.2025 | 18:09
Հարավկորեացի ռեփեր PSY-ն (իսկական անունը՝ Պակ Չե Սան), որը համաշխարհային ճանաչում է ձեռք բերել 2012 թվականի իր «Gangnam Style» հիթով, ձերբակալվել է Սեուլում։ «Արմենպրես»-ի հաղորդմամբ՝ այս մասին հայտնում է The Times-ը։
Ոստիկանության տվյալներով՝ 47-ամյա արտիստին կասկածում են առողջության պահպանման մասին օրենքի խախտման մեջ։ Ըստ հետաքննության՝ վերջին երեք տարիներին նա երրորդ անձանց, այդ թվում՝ իր մենեջերի միջոցով, հոգեմետ դեղերի դեղատոմսեր է ստացել՝ անքնության և դեպրեսիայի բուժման համար։ Սակայն երգիչը ինքն անձամբ երբևէ չի այցելել բուժհաստատություն։
Իրավապահները խուզարկել են այն հիվանդանոցը, որը դեղեր է տրամադրել արտիստին, և առգրավել համապատասխան գրառումները։ Երգչի բժիշկը հերքել է բոլոր մեղադրանքները։
PSY-ն հանրաճանաչ դարձավ «Gangnam Style» երգի վիրուսային տեսահոլովակով, որն այս պահին YouTube-ում դիտվել է ավելի քան 5 միլիարդ անգամ։ Հիթը գլխավորել է հիթ-շքերթները ավելի քան 30 երկրներում, այդ թվում՝ ԱՄՆ-ում, Մեծ Բրիտանիայում, Կանադայում, Ֆրանսիայում և Գերմանիայում, իսկ 2012-ին արժանացել է MTV Europe Music Award մրցանակին՝ «Լավագույն վիրուսային հիթ» անվանակարգում։
PSY-ի հիմնադրած P Nation գործակալությունը հաստատել է, որ արտիստը տառապում է անքնությունից և քնաբեր դեղեր է ընդունում միայն բժշկի ցուցումով։
