23.05.2026 | 23:15
Ըմբիշ Շահեն Մարտիրոսյանը վստահ հաղթանակով դարձավ Եվրոպայի Մ-15 չեմպիոն. ՏԵՍԱՆՅՈՒԹ
Անկարայի ընդդիմադիր քաղաքապետն արձագանքել է Նեթանյահուի՝ Հայոց ցեղասպանությունը ճանաչող հայտարարությանը
Քաղաքականություն
28.08.2025 | 21:38
Թուրքիայի գլխավոր ընդդիմադիր Ժողովրդահանրապետական կուսակցությունից Անկարայի քաղաքապետ Մասուր Յավաշը, որը հայտնի է իր ազգայնական հայացքներով, արձագանքել է Իսրայելի վարչապետ Բենիամին Նեթանյահուի կողմից Հայոց ցեղասպանության ճանաչման մասին հայտարարությանը։
«Նեթանյահուն, որը պատմության մեջ է մտել որպես մարդկության դեմ հանցագործությունների հեղինակ՝ տարիներ շարունակ պաղեստինցի ժողովրդի նկատմամբ գործադրած օկուպացիայի, կոտորածի և ճնշումների միջոցով, թիրախավորում է մեր երկիրը՝ խեղաթյուրելով 1915 թվականի իրադարձությունները, ինչը երեսպաշտության, կոռուպցիայի և անամոթության ամենաակնհայտ ցուցիչն է»,- գրել է Յավաշը X-ի իր միկրոբլոգում։
Ըստ նրա՝ «Գազայում հազարավոր անմեղ երեխաների, կանանց և խաղաղ բնակիչների կոտորած, սովն ու ծարավը որպես զենք օգտագործած և հիվանդանոցներն ու դպրոցները ոչնչացրած անձն իրավունք չունի մարդկության մասին մի խոսք անգամ ասելու»։
«Թուրք ազգը երբեք չի հաշտվի իր պատմության խեղաթյուրման հետ։ Ես խստորեն դատապարտում եմ Նեթանյահուի հայտարարություններն ու ևս մեկ անգամ ընդգծում, որ ստերը չեն կարող լվանալ անմեղ մարդկանց արյունը իր ձեռքերից»,-հայտարարել է Անկարայի քաղաքապետը։
Հիշեցնենք, որ ավելի վաղ էլ Թուրքիայի ԱԳՆ-ն էր դատապարտել Նեթանյահուի հայտարարությունը՝ հերթական անգամ ժխտելով Հայոց ցեղասպանությունը։
Թարգմանությունը՝ Էմմա Չոբանյանի
