14.07.2026 | 17:22
Եվրախորհրդարանում Բաքվում պահվող հայ գերիների հետ կապված համաժողով է ընթանում
Ալիևը ԵՄ ներկայացուցչի հետ քննարկել է Վաշինգտոնում ՀՀ-ի հետ ստորագրված փաստաթղթերը
Քաղաքականություն
28.08.2025 | 13:27
Ադրբեջանի նախագահ Իլհամ Ալիևն ընդունել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոյին։ Ադրբեջանական կողմի հաղորդմամբ՝ Գրոնոն շնորհավորել է Ադրբեջանի նախագահին Վաշինգտոնում Հայաստանի հետ հարաբերությունների կարգավորման և խաղաղության օրակարգի հարցում ձեռք բերված կարևոր արդյունքների կապակցությամբ։
Նա ընդգծել է, որ այդ գործընթացը մեծ ներդրում է ունեցել տարածաշրջանում երկարատև խաղաղության ապահովման գործում ու նշել՝ Եվրամիության անդամ պետությունները նույնպես աջակցում են Ադրբեջանի և Հայաստանի միջև ձեռք բերված խաղաղությանը։
Մագդալենա Գրոնոն նաև ասել է, որ Եվրամիությունը պատրաստ է աջակցել երկու երկրների միջև համաձայնեցված հարցերի իրականացման գործընթացին, այդ թվում՝ տրանսպորտային միջանցքի։
Իլհամ Ալիևն իր հերթին նշել է, որ Վաշինգտոնում ձեռք բերված արդյունքները պատմական նշանակություն ունեն, ընդգծել ԱՄՆ-ի դերն այդ գործընթացում։ Ալիևն ասել է, որ Միացյալ Նահանգների միջնորդությամբ ստորագրված Վաշինգտոնյան հռչակագիրը, խաղաղության համաձայնագրի նախաստորագրումն ու Ադրբեջանի և Հայաստանի համատեղ նամակը Մինսկի խմբի լուծարման վերաբերյալ կարևոր քայլեր են, որոնք ձեռնարկվել են խաղաղության գործընթացում։
Հանդիպմանը ևս մեկ անգամ ընդգծվել է Ադրբեջանի հիմնական մասի և Նախիջևանի շրջանի միջև անխոչընդոտ տրանսպորտային ու տարանցիկ կապի հաստատման կարևորությունը, նշվել է նաև, որ Եվրամիության հետ համագործակցության լայն հնարավորություններ կան, մասնավորապես, Նախիջևանի տրանսպորտային ենթակառուցվածքների արդիականացման ոլորտում:
Հաղորդվում է, որ զրույցի ընթացքում մտքեր են փոխանակվել Ադրբեջանի ու ԵՄ-ի միջև համագործակցության հեռանկարների շուրջ։
Թարգմանությունը՝ Էմմա Չոբանյանի
