29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ամբողջ Իսրայելում զանգվածային բողոքի ցույցեր են. ՏԵՍԱՆՅՈՒԹ
Քաղաքականություն
26.08.2025 | 22:37
Իսրայելում այսօր զանգվածային բողոքի ցույցեր են անցկացվել՝ պահանջով անհապաղ ազատ արձակել ՀԱՄԱՍ-ի կողմից պատանդառված իսրայելցիներին և դադարեցնել Գազայի հատվածում պատերազմը։ Ցուցարարներն առավոտից փակել են երկրի բազմաթիվ ճանապարհներ, այդ թվում՝ Թել Ավիվի մոտ գտնվող կարևոր Այալոն մայրուղին, որը ժամանակավորապես փակվել է, գրում է DW-ի ռուսական ծառայությունը։
Տեղական լրատվամիջոցների փոխանցմամբ՝ ԱՄՆ դեսպանատան դիմաց տեղադրվել է 2023 թվականի հոկտեմբերի 7-ին առևանգված իսրայելցիների պատկերներով պաստառ։ Թել Ավիվից հյուսիս ցուցարարներն այրել են մեքենաների անվադողեր։
Պատանդների հարազատների ֆորումը կոչ է արել մասնակցել համազգային «Քաղաքացիական համերաշխության օրվան», որի շրջանակում Իսրայելի ամբողջ տարածքում նախատեսված են բազմաթիվ միջոցառումներ։
Բողոքի ակցիայի մասնակիցներն Իսրայելի վարչապետ Բենիամին Նեթանյահուին մեղադրում են քաղաքական պատճառներով պատերազմը միտումնավոր երկարաձգելու մեջ, քանի որ հրադադարին դեմ են նրա աջակողմյան կոալիցիոն գործընկերները, որոնք մեծապես պատասխանատու են Նեթանյահուի իշխանությանը մնալու համար։
Իսրայելի ընդդիմության առաջնորդ Յաիր Լապիդը պահանջել է, որ Իսրայելի կառավարությունը համաձայնության գա ՀԱՄԱՍ-ի հետ՝ պատերազմը դադարեցնելու և պատանդներին ազատ արձակելու համար։ Լապիդը Ynet լրատվականին ասել է, որ միջնորդ երկրներից մեկի բարձրաստիճան պաշտոնյան իրեն ասել է, որ Իսրայելի իշխանությունները դեռևս չեն արձագանքել համաձայնության հասնելու վերջին առաջարկին։ Նրա խոսքով՝ ՀԱՄԱՍ-ը մոտ մեկ շաբաթ առաջ համաձայնել է ԱՄՆ հատուկ դեսպան Սթիվ Ուիթկոֆի կողմից գարնանն առաջարկված պլանի «98 տոկոսին»։
Ծրագիրը ներառում էր 60-օրյա հրադադար, որի ընթացքում նախ պետք է ազատ արձակվեին 10 իսրայելցի պատանդներ՝ պաղեստինցի բանտարկյալների ազատ արձակման դիմաց։
Մերձավոր Արևելքում իրավիճակը կտրուկ սրվել է 2023 թվականի հոկտեմբերի 7-ին, երբ ՀԱՄԱՍ շարժումը, որը Եվրամիության և Միացյալ Նահանգների կողմից ճանաչվել է որպես ահաբեկչական կազմակերպություն, լայնածավալ հարձակում է իրականացրել Իսրայելի վրա։ Զինյալները սպանել են շուրջ 1200 մարդու, ավելի քան 250-ին՝ պատանդ վերցրել և տարել Գազայի հատված:
Իսրայելը պատասխանել է՝ պատերազմ հայտարարելով ՀԱՄԱՍ-ին, որը շարունակվում է մինչ օրս։
ՀԱՄԱՍ-ի կողմից վերահսկվող առողջապահության նախարարության տվյալներով՝ Գազայի հատվածում ցամաքային գործողությունների և ռմբակոծությունների հետևանքով զոհվել է ավելի քան 62,000 պաղեստինցի, վիրավորվել՝ ավելի քան 157,000-ը։
Թարգմանությունը՝ Էմմա Չոբանյանի
