23.05.2026 | 23:15
Ըմբիշ Շահեն Մարտիրոսյանը վստահ հաղթանակով դարձավ Եվրոպայի Մ-15 չեմպիոն. ՏԵՍԱՆՅՈՒԹ
Կիևին ՆԱՏՕ-ի անդամակցությանը մոտ անվտանգության երաշխիքներ են անհրաժեշտ․ Գերմանիայի ԱԳ նախարար
Քաղաքականություն
25.08.2025 | 14:14
Ռուսաստանի հետ հնարավոր խաղաղության համաձայնագրից հետո Ուկրաինայի ապագա անվտանգության երաշխիքները պետք է «շատ մոտ» լինեն ՆԱՏՕ-ին անդամակցությանը։ Այս մասին հայտարարել է Գերմանիայի արտաքին գործերի նախարար Յոհան Վադեֆուլը, փոխանցում է DW-ի ռուսական ծառայությունը։
«Մենք չենք կարող պահանջել Ուկրաինայից լրջորեն մտածել տարածքային զիջումների մասին, եթե այն հնարավորինս շատ պետություններից չստանա իրական անվտանգության երաշխիքներ, որ առնվազն մնացած մասը [ուկրաինական տարածքի] անվտանգ կլինի»,- գերմանացի պաշտոնյայի խոսքերն է մեջբերում dpa գործակալությունը։
Նա հույս է հայտնել, որ նման անվտանգության երաշխիքների հարցում պնդելը, ի վերջո, կհամոզի Ռուսաստանի նախագահ Վլադիմիր Պուտինին: Վադեֆուլը նաև ընդգծել է՝ նման երաշխիքները սպառնալիք չեն ներկայացնի Ռուսաստանի համար:
«Այդ դեպքում սա կարող է հիմք դառնալ, որպեսզի մենք՝ Եվրոպայում, վերջապես կրկին խաղաղություն գտնենք»,- նշել է նա։
Վադեֆուլն ընդգծել է, որ ոչ միայն ԵՄ երկրները, այլև այլ երկրներ, մասնավորապես, Միացյալ Նահանգները, պետք է Ուկրաինային անվտանգության երաշխիքներ տրամադրեն։ Այս պահին շուրջ 30 երկիր, այդ թվում՝ Ճապոնիան, պատրաստակամություն են հայտնել աջակցել Ուկրաինային, հավելել է նա։
Պաշտոնյան նաև հայտարարել է, որ Ռուսաստանի և Ուկրաինայի միջև պատերազմի ավարտի մասին համաձայնագիրը չպետք է դառնա «բռնապետական խաղաղություն»՝ ի վնաս Ուկրաինայի։
Թարգմանությունը՝ Էմմա Չոբանյանի
