07.09.2026 | 22:53
Գավառում հայտնաբերվել է ապօրինի պահվող զենք-զինամթերք․ 59-ամյա տղամարդը կալանավորվել է
Ռումինիան պատրաստ է ՆԱՏՕ-ին բազաներ տրամադրել՝ հանուն Ուկրաինայում խաղաղության
Քաղաքականություն
22.08.2025 | 15:55
Ռումինիայի կողմից իր ռազմական բազաները Միացյալ Նահանգներին և ՆԱՏՕ-ի մյուս դաշնակիցներին տրամադրելը կարող է լինել Բուխարեստի ներդրումը Ուկրաինայի անվտանգության երաշխիքների իրականացման գործում: Այս մասին հայտարարել է Ռումինիայի վարչապետ Իլիե Բոլոժանը, գրում է DW-ի ռուսական ծառայությունը։
Ընդգծելով, որ իր երկիրը սեփական զինված ուժերը չի ուղարկի Ուկրաինա և «չի մասնակցի զորքերի որևէ տեղակայման Ուկրաինայի տարածքում», Ռումինիայի վարչապետը նշել է. «Սա շատ հստակ դիրքորոշում է: Մեր դաշնակիցների հետ մեր քննարկումների երկրորդ թեման այն էր, որ Ռումինիայի անդամակցությունը ՆԱՏՕ-ին, մեր ռազմական բազաները, որոնք արդեն համատեղ շահագործվում են Ռումինիայի և ՆԱՏՕ-ի զինված ուժերի կողմից, հիմնականում՝ ավիաբազաները, պետք է հասանելի լինեն ՆԱՏՕ-ի զորքերին, ԱՄՆ-ի զորքերին և այլ դաշնակիցներին։ Սա կարող է լինել, այսպես ասած, Ռումինիայի ներդրումը Ուկրաինայում երկարատև խաղաղության ապահովման գործում»:
Բոլոժանը հիշեցրել է, որ Ռումինիայի օդանավակայաններն արդեն օգտագործվում են Սև ծովում օդային պարեկությունների և իրադարձությունները վերահսկելու համար, իսկ երկրի զինված ուժերը համատեղ զորավարժություններ են անցկացնում իրենց դաշնակիցների հետ:
Ավելի վաղ Ռումինիայի պաշտպանության նախարարությունը հայտարարել էր, որ Բուխարեստը «հուսալի և ակտիվ դաշնակից է ՆԱՏՕ-ի արևելյան թևի պաշտպանության գործում և շարունակում է հանձնառու լինել Ուկրաինային բազմակողմանի և կայուն աջակցություն ցուցաբերելուն՝ ՆԱՏՕ-ի և Եվրամիության հետ սերտ համագործակցությամբ»:
