16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Կերչում վերջին հրաժեշտը տվեցին քոլեջում տեղի ունեցած ողբերգության զոհերին
Քաղաքականություն
19.10.2018 | 16:59
Ղրիմում վերջին հրաժեշտն են տվել Կերչի պոլիտեխնիկական քոլեջում տեղի ունեցած ողբերգության 17 զոհերին: Մյուս զոհվածներին կհուղարկավորեն իրենց ծննդավայրերում՝ Ղրիմի թերակղզու սահմաններից դուրս:
Ողբերգության հեղինակին՝ նույն ուսումնական հաստատության 18-ամյա ուսանող Վլադիսլավ Ռոսլյակովին, առանձին կհուղարկավորեն: «Հրաձիգի ազգականները դեռ չեն դիմել (մարմինն ստանալու)», – «Ինտերֆաքս»-ին ասել է Կերչի վարչակազմի ներկայացուցիչը:
Հրաժեշտի արարողությանը մասնակցել են Ղրիմի ղեկավար Սերգեյ Աքսյոնովը, խորհրդարանի խոսնակ Վլադիմիր Կոնստանտինովը, տասնյակ հազարավոր քաղաքացիներ:
Հիշեցնենք, որ հոկտեմբերի 17-ին Կերչի պոլիտեխնիկական քոլեջի 4-րդ կուրսի 18-ամյա ուսանող Վլադիսլավ Ռոսլյակովը ինքնաշեն պայթուցիկ սարքով ուսապարկը թողել էր ուսումնական հաստատության ճաշարանում, հետո կրակ բացել ուսանողների և դասախոսների ուղղությամբ ու ինքնասպան եղել: Կատարվածի փաստով նախ քրեական գործ էր հարուցվել «ահաբեկչության» հոդվածով, հետո այն վերաորակավորվել էր «սպանության»:
Ողբերգության հետևանքով 21 մարդ է զոհվել, այդ թվում՝ հրաձիգը: 43 տուժածներ Ղրիմի, Կրասնոդարի երկրամասի և Մոսկվայի հիվանդանոցներում են: Նրանցից մի քանիսի վիճակը շարունակում է ծայրահեղ ծանր մնալ:
