10.10.2026 | 11:12
Վարորդական վկայական ստանալու «պարզեցված» առաջարկները խարդախություն են․ ՆԳՆ-ն զգուշացնում է
Աշխարհը չափազանց դրական ընդունեց Վաշինգտոնում կայացած եռակողմ հանդիպումը․ Զելենսկի
Քաղաքականություն
10.08.2025 | 17:28
Ուկրաինայի նախագահ Վլադիմիր Զելենսկին զանգահարել է Ադրբեջանի նախագահ Իլհամ Ալիևին։
«Ես շնորհավորեցի պարոն նախագահին և Ադրբեջանի ողջ ժողովրդին՝ նախագահ Թրամփի օգնությամբ Հայաստանի հետ ձեռք բերված համաձայնությունների կապակցությամբ՝ Հարավային Կովկասի տարածաշրջանում երկարատև խաղաղության և հուսալի անվտանգության համար։ Աշխարհը չափազանց դրական ընդունեց Վաշինգտոնում կայացած եռակողմ հանդիպումը։ Մենք հույս ունենք, որ ամեն ինչ կստացվի»,-նշել է Զելենսկին։
Նրա խոսքով՝ բոլորը հավասարապես վճռական են պատերազմն իսկապես դադարեցնելու և արդյունավետ դիվանագիտություն վարելու հարցում։
«Մենք քննարկեցինք Միացյալ Նահանգների, եվրոպական երկրների հետ փոխգործակցությունը, ինչպես նաև հիմնական սկզբունքները, որոնք կարող են մոտեցնել խաղաղությանը։ Ես շնորհակալ եմ մեր ժողովրդի և պետականության աջակցության համար։ Կարևոր է, որ աշխարհի համատեղ ջանքերը վերջապես ստիպեն Ռուսաստանին դադարեցնել ռազմական գործողությունները և ագրեսիան։
Մենք նաև քննարկեցինք մեր էներգետիկ համագործակցությունը Ադրբեջանի հետ։ Մեզ հաջողվեց հասնել նշանակալի արդյունքների։ Մենք համաձայնեցինք, որ այսքանով կանգ չենք առնի և կշարունակենք աշխատել մեր հնարավորությունների ընդլայնման ուղղությամբ։ Ես տեղեկացրեցի մեր էներգետիկ օբյեկտների վրա Ռուսաստանի հարվածների մասին։ Ուկրաինան սա համարում է Ռուսաստանի կողմից միտումնավոր փորձ՝ խափանելու էներգետիկ ուղիները, որոնք մեզ և մյուս եվրոպական երկրներին ապահովում են էներգետիկ անկախություն։ Մենք անում ենք ամեն ինչ՝ մեր երկիրն ու մեր ժողովրդին պաշտպանելու համար», – գրել է Զելենսկին իր Telegram ալիքում։
