06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Ինքնահռչակ Լուգանսկի իշխանություններն ուկրաինացի երեխաների բազա են հրապարակել, որոնց հնարավոր է որդեգրել
Քաղաքականություն
08.08.2025 | 22:44
Այսպես կոչված, Լուգանսկի «հանրապետության» Կրթության և գիտության նախարարության կայքում առնվազն 294 ուկրաինացի որբ երեխայի տվյալներ են հրապարակվել: Այս փաստին ուշադրություն է հրավիրել Save Ukraine բարեգործական կազմակերպության ղեկավար Նիկոլայ Կուլեբան, փոխանցում է Current time-ը։
Տվյալների բազան թույլ է տալիս որոնել երեխայի ըստ սեռի, տարիքի, աչքերի և մազերի գույնի: Երեխաների լուսանկարներն ուղեկցվում են նրանց բնավորության և նախասիրությունների համառոտ նկարագրությամբ։
«Երեխաներին նկարագրում են որպես ապրանք։ Պարզապես պատկերացրեք՝ կարող եք երեխաներին զտել ըստ աչքերի և մազերի գույնի: Մեր ուկրաինացի երեխաների նկարագրման ձևը ոչնչով չի տարբերվում ստրուկների կատալոգից։ Այս «կատալոգում» ներկայացված երեխաների մեծ մասը ծնվել է Լուգանսկի շրջանի օկուպացիայից առաջ և ունեցել է Ուկրաինայի քաղաքացիություն: Նրանցից ոմանց ծնողները սպանվել են օկուպացիոն իշխանությունների կողմից, մյուս երեխաների համար պարզապես պատրաստվել են ռուսական փաստաթղթեր՝ նրանց առևանգումն օրինականացնելու համար»,- գրել է Կուլեբան:
Այսպես կոչված «Լուգանսկի ժողովրդական հանրապետության» իշխանությունները 2021 թվականին արդեն հրապարակել են որդեգրման ենթակա երեխաների նմանատիպ տվյալների բազա, նշում է «Նովայա գազետա Եվրոպա»-ն։
2023 թվականի մարտի 17-ին Հաագայի Միջազգային քրեական դատարանը Վլադիմիր Պուտինի և Մարիա Լվովա-Բելովայի ձերբակալության օրդեր է տվել։ Նրանք մեղադրվում են Ուկրաինայի օկուպացված տարածքներից Ռուսաստան երեխաների անօրինական արտաքսման մեջ։
Ուկրաինական իշխանությունների պաշտոնական տվյալների համաձայն՝ 2022 թվականի փետրվարի 24-ից ի վեր Ուկրաինայից Ռուսաստան է արտաքսվել 19,546 երեխա։ Ռուսական կողմը, իր հերթին, պնդում է, որ Ռուսաստանում «գրանցված» է 700 հազար ուկրաինացի երեխա։ Որոշ դեպքերում նրանք որդեգրման են հանձնվել ռուս ընտանիքներին։
